中環在線：
燒山千金幫老竇賣牛
「燒山」蕭若元嘅靚女千金蕭瑤瑤，芳齡22歲，舊年喺港大政治哲學系畢業，最近加入爸爸間公司學做生意。佢唔係幫手做文化事業或者放數喎，而係賣韓國國寶韓牛
，負責做marketing。
蕭若元旗下有間創業板上市公司易還財務（8079），一聽個名，就知係做放數生意啦，原來老蕭今年靜雞雞撈過界，開設冷凍食品加工業務，新近引入韓牛，交畀蕭瑤瑤做推廣。
蕭若元噚日帶埋蕭瑤瑤講解韓牛業務，大家對上一次見蕭瑤瑤，佢仲講緊去投資銀行做實習，未打算加入公司，可能佢都係鍾意幫爸爸打工多啲。
蕭瑤瑤好文靜，全程陪實爸爸，間中幫手撈牛肉刺身咁，好少出聲，所有問題由蕭若元自動波答曬。蕭若元以前講過，蕭瑤瑤對錢冇乜概念，咁將來會否跟爸爸學番一兩招財技呢？呢嚇蕭瑤瑤就答得好快，話要「之後再睇」，似乎冇乜興趣。
講番韓牛，蕭才子一講起就滔滔不絕，由點樣配種、有幾矜貴，邊個部位最好食，講到「好食到喊出嚟」，認真誇張。韓牛一向供不應求唔出口，直到舊年底先至有限量供港。今次易還旗下凍肉公司俊興同韓國濟州島簽訂獨家代理，每日空運一隻韓牛到港，供應餐廳之餘仲做網購「韓牛快遞」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
