中環在線：嫌表現唔好
耀才炒三女主播
臨近年尾，財金界頻頻出現「炒風」，但唔係炒股個炒，而係炒人個炒，渣打、星展、瑞信相繼炒人，就連成日話招兵買馬嘅本地券商耀才（1428）都要炒人，旗下財經台三位女主播慘食「無情雞」。
每年農曆新年，耀才主席葉茂林都拖住半打靚女主播現身，請客戶睇戲兼派利是，前年仲話要將耀才財經台上市㖭。點知家陣上市冇影，仲要炒人。上星期炒走三位女主播，唔見一半人。
曾小如返nowTV
華華問過耀才行政總裁許繹彬（Edmond），佢強調，並非公司唔掂要炒人，而係主播試用期表現唔好先炒（三個都唔好？），但問到會否請番三名女主播，佢就話唔會，指台長要重整節目，因應觀眾要求，減少講股環節，加入其他消閒資訊。佢堅持話，公司一直請緊人，仲物色緊分店舖位㗎。
而事實上，並唔係三位主播都過唔到試用期，好似其中一位曾小如（Kay），喺耀才已經做咗年幾。浸大傳理系畢業嘅Kay，做耀才之前做過nowTV體育主持，好彩今次慘食「無情雞」後，好快返番nowTV做體育主持。
之但係，耀才炒剩兩三名女主播，明年葉老闆出嚟派利是咪冇咁威囉！Edmond就話唔使擔心，指公司有唔少靚女同事喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
