股仔賣殼潮
2016年12月29日
美股喺聖誕後重開雖然升左，但就蝸步前行，杜指只係升得11點，令佢差一步之遙，仍然未能上破兩萬點大關。中環茶友笑言，若然按這個速度行軍，睇怕好友喺2016年都未能攻克這個重要心理關口！
基金經理埋數等分紅
杜指喺二萬點呢個彈指即破嘅關口攻左咁耐都唔能夠成功，睇落有啲奇
怪，實際都有解釋，茶友話兩萬點若然撕破，對好友嚟講係重要嘅里程碑，好可能基金要再入貨，令杜指可以長驅直入，再升一段，但正因為呢個關口咁重要，好多投資者都走精邊，先行喺高位沽貨，鎖定利潤，所以獲利回吐壓力係呢啲位就特別大，尤其從基金經理解角度，佢地唔係奧運選手，破左紀錄唔會有獎，喺兩萬點前沽左貨，埋年結就肯定可以分花紅，咁又點解要咁博先？所以喺呢啲位，關口好似彈指即破，但係點解咁難衝過，主要就係有人的心理喺度作祟。
美股兩萬點前拉鋸，內地股市就弱弱地，港股開市無乜力，但下午開始有買盤推番高個市，我懷疑呢個亦係同年結現象有關。恒指同美股飆至全年以至史高位唔同，港股今年高位係第三季，跟住就反覆回落，但同年初比O依家仲有啲進帳，基金經理若然撐番住個市高小小，咁都容易啲對個客交代。由於O依家重磅股好多都調整左一段，喺買賣兩閒下，基金入市托高啲唔係咁蹝力，所以估計未來兩個交易日，個市都會係呢啲位浮沉吓，等一月份再戰。
大市昨日本來先跟內地股市向下，午後靠騰訊(700) 、建行(939) 等中資金融股谷番高、工行(1398) 及中行(3988) 合力推高大市，恒指最多升237點，收市前升幅稍收窄。恒指收報21754點，上漲179點；國企指數收報9300點，升118點，成交只有515億元。
藍籌中騰訊大升2.2%，報183.6元；建行走高4.8%，報5.89元；工行、中行升逾1%。蘋果公司股價周二於美市一度逼近52周高位，帶動部份本港上市的手機設備股周三造好，其中瑞聲(2018) 升3.4%，報69.75元；舜宇光學(2382) 更大漲5.5%，報34.6元。市場憧憬內地加快基建建設，帶動鐵路及鐵路設備股普遍上揚，中國中鐵(390) 升2.3%，報6.34元；中交建(1800) 升3.3%，報8.78元。
假後內地投資氣氛仍然有啲緊張，主要係監管機構加強監管，加上要防止外匯流失。影響之下個市買賣兩閒，成交稀疏，呢啲咁嘅市短炒唔容易，策略一係等藍籌再低番啲儲入博佢中線反彈；如果唔係就要吼中有特別情況嘅股份，先有機會賺快錢。
良斯成功易手
雖然大市有年結收爐氣氛，但公司賣殼就繼續活躍。良斯集團(1683) 假後公佈，控股股東佰向獨立第三方國能商業轉讓75%股權，涉及3.75億股股份；總代價6.48億元，買家仲會提出全面收購，每股現金1.728元，雖然今次出價較停牌前溢價只有2.25%，但由於佢之前股價已經持續上升，顯示控制權有好大可能易手。公佈話新買家國能商業主要從事大宗能源及資源商品貿易以及相關投資貿易。
良斯喺2015年上市，公司主要係做裝修，掛牌後生意表現不過不失，呢類生意唔係咁易做大，上到市賣左盤大股東可以有一筆落袋，算係好好嘅結果。O依家監管機構話想收緊賣殼，但殼股仍然有價，皆因好多內地民企仍然覺得上A股好難，有興趣嚟香港買殼，所以雖然內地限制資金流出，但賣殼活動似乎未受影響，新年過後或者重會有呢類消息，股仔嘅尋寶炒作潮仲會有得玩。
陸羽仁
金融High Tea 舊文
來源 source: http://hdfin.stheadline.com
