操盤手劄記：
內需醜股雞年翻身
■恒安主席施文博。 資料圖片
過兩日就過年，按照習俗「年廿八，洗邋遢」，我都大掃除，執嚇個倉。港股年三十（周五）半日市，之後收爐，初五（下周三）啟市。值得注意嘅係復市當日咁啱美國聯儲局議息，利率期貨顯示，今次有95%機會維持利率不變，6月先有50%
機會加息，但最怕買大開細。大家不妨先行減磅，增持現金過年。
長假期在即，期指結算前夕，恒指收23049點，升99點，主板成交縮減一成至537億元，反映投資者無心戀戰。人行一招「加息式放水」，透過提高MLF利率推升資金成本，令資金面受衝擊。港股後市料繼續於23000關拉鋸，1月18日高位23151仍為初步阻力。
繼上周美國總統特朗普唱淡美元後，本周候任財長姆欽又加把口，導致美滙指數跌穿頭肩頂頸線，走勢進一步轉弱。不過，官員齋噏只係噪音，技術分析亦存在陷阱。美元後向，要睇美債。喺股市波幅不斷收窄下，資金已明顯轉移，債市醞釀大撼大！
債王格羅斯喺本月報告指出：「若10年期美債收益率突破2.6厘，意味債市熊市已到……這比道指20000點、油價60美元、美元兌歐元平價都重要得多。2.6厘關口乃影響2017年利率水平和股價關鍵。」隔晚10年期美債債息收2.4652厘，升2%。特朗普嘅「美國優先」方針，亦令市場擔心美國走向極端保護主義。面對中美可能爆發貿易戰，揀股要趨吉避凶，以中國市場為主及估值低殘嘅內需股可能受惠。舊年表現最差嘅藍籌股中，內需股百麗（1880）及恒安（1044）分別排名第五及第十。我比較睇好恒安，皆因佢係生活用紙龍頭。
瑞信日前發表報告，預期恒安舊年下半年經營利潤好過預期，並將目標價由75元調高至77元。內需股舊年基數好低，相信上半年仍處於估值修復狀態，有一定值搏率。恒安現價62.4元，今年以來已反彈9.6%，跑贏恒指嘅4.8%升幅。睇走勢圖，該股呈現杯柄突破利好訊號，兼20日線即將升穿50日線，醞釀黃金交叉。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
