【實力取勝】師兄弟會全部歸位 今年會有一月效應（陳承龍）（第106期）
2017-1-8 14:00:56
終於嚟到2017年，好緊張呀！點解？因為說好了的十年周期，終於到啦！2017年第一個交易日都算係咁啦，有啲升幅，我之前都有啲開得差，延續唔到2016年last嗰幾日嘅反彈，
咁就斷纜，尤其除夕前個ADR跌成160點，跟手返嚟又低開，好彩之後快掃返上嚟，最後收市有過百點升幅，都算有個好兆頭啦！
事實上，睇返年尾嗰幾日，港股都算係咁，冇乜成交，而且好多外資基金經理都放咗假，但好在有北水嚟香港托住，淨係睇隻建行（00939.HK）就知，暴力式掃法，又OK喎，仲有隻中興通訊（00763.HK），都掃得好高興，所以千祈唔好忽視北水嘅力量。
至於今個月個市點睇，我係會睇好嘅，點解？因為我信今年會有一月效應。乜嘢係一月效應？根據維基百科指出，一月效應係從統計學角度分析股市走勢的一種慣常現象，指一月份的回報率往往是正數，而且會比其他月份為高，相反在十二月的股市回報率很多時會呈現負值。在傳統股市智慧之中，每逢踏入新一年的一月，股市總是升的多，跌的少。最初出現一月效應的國家是美國，然後其他國家的學者也陸續發現一月效應存在其他股市之中。對於一月效應的出現，學者認為這與美國資本增值稅的稅務安排、基金粉飾櫥窗、員工的年終花紅及美國年尾的重要假期（感恩節、聖誕節、元旦）有莫大關係。
有好多行家之前都有統計過一月效應嘅命中率有幾高，其實都係一半一半，過去二十年，大概係50多少少嘅百分比，不過，我覺得今年一月效應出現嘅機會係偏高，一來，第一個交易日叫做收升，二來，去年12月個市真係衰到冇朋友，已符合咗一月效應嘅先決條件，仲有喎，12月時，有好多股票個價係喺冇乜成交下打落嚟，好似我隻愛股滙控（00005.HK），上個月頭衝上67元嗰朝早， 開市頭10分鐘已做了700萬股成交，但係之後回落，全日都係得約1000萬股成交，我總係覺得係呃我哋啲貨出嚟，而更重要一點，有好多股已累積一定的跌幅，個基數低咗，要做真正粉飾櫥窗就出師有名。不過，最真正嘅原因，就係大師睇淡一月，其實都唔止大師，通街都睇得幾淡，所以應該有權挾得幾狠，頭號心水，依然是滙控。
當然，細價股都可以炒嚇嘅，因為啲北水始終要落嚟香港避人民幣貶值，不過，從非港股通途徑嚟香港買股，近期係有啲難度，所以都係買返啲港股通名單股份好似抵博啲，心水有419、547、1188呢啲，或者準深港通股份如1196等。當然，殼股都得，因為呢個依然係合法走資嘅渠道，短期心水有中國糖果（08182.HK），如果啲氣氛好返嘅話，我估各位師兄弟會全部歸位，到時個個又追住喺FB直播狂問冧把。
實力取勝 - 陳承龍 舊文
來源 source: http://www.winmoney.hk
