年頭先炒紅利股
2017年01月17日
英國新鐵娘子文翠珊表明英國有可能硬脫鈎，英鎊匯價有壓力，加上特朗普入主白宮時間漸近，反對佢嘅聲音響起，令人擔心其新政有幾多可以落實得到，恒指開市無幾耐新跣低。我認為，外圍呢啲解釋都係事後諸葛亮，簡單啲就係個市升咗咁多，回吐吓都好正常，如我昨日話
恒指RSI(相對強弱指數)上到近70的高位，短期內你仲想佢點升啫。
電能大手筆派百億
恒指急升近兩萬三千點，若果唔調整夾硬再升，咁之後佢跌落嚟會仲勁，所以佢回落嘅基本因素唔係咁多，主要係走勢主導。恒指昨日低開42點，報22895點，已經跌穿咗100天線，其後跌幅持續擴大，全日最多跌280點，低見22657點，收報22718點，挫219點；國企指數收報9666點，下滑121點，成交569億元。
個市下挫藉口之一係驚英國硬脫鈎，所以滙控(005) 都插咗1.3%，報63.2元，呢排升得多嘅騰訊(700) 收報196.7元，走低1.5%。市傳內地有關當局將於短期內推新保險法規，以規管涉及投資的財險產品，內險股受壓，國壽(2628) 插2.3%，報21.05元；中國太平(966) 下滑2%，報16.16元。
跌市中有幾隻大股逆流而上，一隻係正考慮派發特別息的電能(006) ，逆市升2.8%，報72.5元。長江基建(1038) 年前曾想私有化電能，由於出價未符基金要求拉倒，計計時間大家估計長建都應該有動作，所以最近已流傳電能會出招。
結果，電能昨日宣佈會同長實地產(1113) 、長江基建(1038) ，提出以每股3.03澳元收購澳洲能源公司Duet，三間公司分別在財團持股四成和兩成，會按股權比例出資，總代價約74.08億澳元，相當於424億多港元。長實地產、長江基建及電能實業的最高財務承擔將分別為30.12億澳元(約172.59億港元)、30.12億澳元(約172.59億港元)及15.06億澳元(約86.29億港元)。
一旦長建和電能股東都否決併購，長實地產會獨力收購，如果交易未能通過所有條件，Duet會向長實支付約7300萬澳元終止費。今次收購呢間公司，在澳洲和歐洲等擁有石油天然氣管道、供氣、供電系統等資產，去年稅後純利逾2億澳元，按年升逾3倍。
華置有2元特別息
在參與收購的同時，電能會考慮在1月26日股東會派發特別息中期息每股5元，消息令公司股價即時急升。改行搞埋能源的長實地產昨日跌1.4%，而同係地產股的恒基(012) 跌1.6%，新地(016) 跌0.9%，所以又唔可以話消息對長地好負面。
電能因為手頭有幾百億現金，市場成日昅住佢點用啲錢，有大行估計佢會重提合併，但早前長實傳出收購澳洲公司消息，市場對佢重提合併嘅估計已經降低，而家佢有5元紅利派，反映咗合併機會唔大之餘，都叫做益吓小股東。由於電能係收購動用嘅錢唔係咁多，加上今次都係派咗100億元左右，未來仲有可能再派。電能股份昨日消化咗派息嘅一半，高追着數有限，反而最好等佢回吐至執貨，博賺價之餘仲可以等未來再宣佈派息。
臨近年頭業績期，炒派糖嘅機會都唔少，紅利股有幾隻都都先炒起，逆市報捷。除咗電能，近年成日派錢嘅華人置業(127) 公佈派特別中期股息每股2元，股價都彈咗5%收14.96元。憧憬會有特息派嘅大新金融一度創出57.9元嘅一年高價，收市報57.3元，升0.1元。
陸羽仁
金融High Tea 舊文
來源 source: http://hdfin.stheadline.com
