【不問價追】不問價追凱升（小炒王梁心欣）（第112期）
2017-2-19 16:00:07
小炒王都唔知幾耐無寫「不問價追」，事關追貨都要搵契機，2017年開局唔錯，勇進點加大力度追貨是必然。
開局唔錯來自太陽世紀（01383.HK），老早信心滿滿的走去供股（供股價0.2
元）供到一定數量之後就等睇戲，大約兩個月後，先在0.25元食一注，再在0.45元食埋，賺幅相當可觀。由於我好少參與供股，批貨供完返來我又懶懶閒費時理（因為無咩機會跌穿0.2元，否則一定眼冤），所以食正大浪都屬彩數。呢隻無做推介事關風險高，自己承受好過叫大家博，希望大家明白。
講完一輪要入正題。賺完太陽世紀後，我要不問價追凱升（00102.HK）。
對上一次因為業績造就我由$1.78贏到$2.69，（$3以上點會係我食呀）今次$3就係我的目標，事緣業績期又到。睇凱升，一定要記得俄羅斯的水晶虎宮殿，因為娛樂場60%股權都在凱升手上。
俄羅斯本身係一個「好賭得」的地方，但同時產生了社會問題，莫斯科有四份一人都參與各類型的博彩活動，令總統普京發揮強人本色，限制大型專業賭場要遠離民居，4個獲批的發展地區包括：加里寧格勒（方東昇有帶你去）、阿爾泰邊疆區、南部的克拉斯諾達爾和濱海。水晶虎位處濱海，亦係目前唯一的賭場，起碼到2018年先有競爭對手出現。
俄羅斯人要去遠啲賭，呢點我好明白。到過美國的朋友都知，去親賭場都要坐一至兩個鐘車先有得玩有得食自助餐。本地勒得緊，但外來客無任歡迎。水晶虎賭場和渡假村鄰近中國、韓國、日本，日韓客到澳門起碼五至六小時，去海參威水晶虎？兩至三個鐘！更貼心係機場去賭場的高速都起埋，15分鐘直達。舊年客流量有56萬人，去玩的有46萬，增長三成以上。咁多人去另一重點係簽證寬鬆，中國人客，5人以上的旅行團免簽15日、韓國客60日、其餘外國客至低限度都有8日免簽。呢個政策，刺激中國客的流量增長30%、韓國增60%。
仲有稅收優惠。賭場博彩稅VIP 1-2%，中場3-4%，相比其他地區，簡直低無可低。（韓：統一13-15%、新加坡：VIP12%；中場22%、菲：VIP17%；中場27%、澳門統一39%）咁你話邊個賺錢賺得多？美國總統特朗普一計劃出稅項優惠，金融股都升到飛天，何況係已經實行的海參威？
呢個時候你會話盧布貶值貶得好緊要，你唔諗下自己「唱」緊yen、韓紙去玩？對遊客最大吸引力就係匯水，打七折八折去掃貨人人都想，呢點係無形中幫到手。
政策利好底下，業績改善是肯定。有勢、有基本面，本欄決定不問價追凱升，第一站睇3蚊。
不問價追 - 小炒王梁心欣 舊文
來源 source: http://www.winmoney.hk
