中環在線：
領展滙豐轉身 真係恭喜奶媽
■領展華麗轉身，證明官場冇永遠敵人。
林鄭月娥以低民望、777票當選下一屆特首，一眾大孖沙終於冇落錯注，自然飲得杯落，唔使再「華麗轉身」，但噚日就有兩間機構，疑似急不及待要「轉身」，好似舊年被奶媽稱為「三座大山」之一的領展，噚日無啦啦發新聞稿
，話要恭喜奶媽當選，聲稱對「林太理解現時城市規劃方面有改善空間」，並會「積極處理商業和社區設施不足問題」而感到高興喎，仲話好期待同新政府緊密合作，更好地為社區服務咁話。
林鄭曾促領展檢討營運方針
華華仲記得，舊年六月梁振英仲雄心壯志爭冧莊時，接受傳媒訪問時公開炮轟領展，話領展只求利益，漠視社會責任，可謂拳拳到肉；奶媽亦喺去年五月同建制派飯局時，形容領展係政府要處理的「三座大山」之一，之後佢仲代表政府同領展管理層會面，話要領展檢討營運方針㖭。之但係九月立法會選舉後，領展完成檢討，話拆售商場及外判街市制度「行之有效」，最後係咩嘢都冇改變過嘅。
加入「祝賀奶媽」行列的仲有本港大行滙豐銀行，噚日出新聞稿歡迎林鄭月娥當選。華華冇記錯嘅話，身為滙豐、恒生高層的3名選委，都冇提名奶媽，其中滙豐大班王冬勝更被外界視為是「薯片叔叔」曾俊華嘅支持者。不過，時移勢易，最近市場盛傳奶媽考慮搵王冬勝做下屆財政司司長，再一次反映無論是商場、官場，都冇永遠敵人嘅道理。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
