中環在線：
現身酒會 鄭志剛暗撐海航？
■鄭志剛（左）噚晚低調現身海航酒會；旁為海航集團董事辛笛。
香港航空分拆貨運業務，成立獨立子公司，噚晚舉行慶祝酒會，港航主要股東海航集團董事辛笛作為主人家主持大局，最估唔到係新世界發展（017）第三代接班人鄭志剛（Adrian）竟然低調現身，
又同辛笛有偈傾喎。
Adrian向來好少出席呢類畀面派對，佢旗下主要做地產同珠寶生意，爸爸鄭家純最近染指有線（1097）啫，若要講到航空業務，極其量係新世界旗下新創建（659）有投資北京首都機場（694），加上海航集團最近來港搶地，同新世界係對手，難得Adrian呢次咁畀面海航喎。
主人家似乎亦好重視佢，酒會有亮燈儀式，司儀開咪邀請佢上台，但只見另一位不知名人士代佢上台。酒會結束，見Adrian企喺會場門口同海航董事辛笛傾咗幾分鐘，轉頭就閃咗，唔知佢哋有乜大計傾呢？
Sorry Sir上台唱《海闊天空》
同場仲有人稱「Sorry Sir」嘅警隊前一哥鄧竟成，佢舊年加入港航做副主席，噚日西裝骨骨現身，依然好弗。
鄧竟成話，退休6年，重出江湖，加入港航，係覺得港航嘅工作符合自己退休目標，可以幫到年輕人開拓新事業咁話。
以為阿Sir講飛機、講燃油成本好新奇？唔止，原來鄧竟成過咗港航後，同一班管理層喺周年晚會大展歌喉，據聞係唱Beyond首本名曲《海闊天空》！問阿Sir係咪好鍾意唱歌，佢就話自己其實好少唱：「上到台驚俾人掟橙多啲！」
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
