買中電好過買年金
2017年04月27日
美股繼續炒吓特朗普減稅方案，指數重上高位，當中科技股為主嘅納斯達克指數率先創咗新高，反映傳統行業俾高新科技過頭嘅事實。
納指係二○○○年科網狂潮曾經升破5000點，之後泡沫爆破，指數插穿1300點，跌咗七成半有多，經過十幾年時間，指數
重新爬升，突破咗6000點大關，而家唔同嘅係納指已經由蘋果、阿馬遜等五間大公司領導，阿馬遜老闆貝索斯仲取代股神巴菲特成為全球第二大富豪，同首富蓋茲同樣係以科技稱霸商場，而過去唔沾手科技嘅股神都買入蘋果股份，作為投資組合一部份。有中環茶友話，由呢個角度去睇，美股屢創新高，同總統特朗普嘅關係唔係咁大，美國企業係科技領先全球，創造咗大量財富，而家中國係科網同人工智能，電動車等新領域，希望能夠同美國比肩，中國經濟係咪升級成功就好睇呢樣啦。
濠賭股對黃銅有憧憬
雖然茶友話美股向好，同特朗普新政真正關係唔係咁大，但借住呢個概念個市繼續炒炒吓，港股再升近今年高位。恒指最多升181點，午後升幅逐步收窄，收報24578，升122點；國企指數收報10317，漲45點，成交金額786億元。藍籌股普遍向好，滙控(005) 升0.47%報64.1元；友邦(1299) 升1.89%報51.3元；工行(1398) 升0.78%報5.14元；建行(939) 升0.32%報收6.37元。
其他板塊中，濠賭股開始熱身炒吓5.1，借住市場預期澳門即將公佈的4月份博彩收入將續錄升幅，金沙(1928) 彈升3.7%報36.85元；銀娛(027) 升4.8%報44.15元，成表現最佳藍籌股。其他濠賭股澳博(880) 升5.6%報7.6元；新濠國際(200) 走高5.4%報16.06元，有小小一浸浸炒落去嘅味道。
穩賺8%收足15年
兩電公佈同政府傾斟未來15年嘅利潤管制協議，一聽話准許利潤由9.9%減到8%，即係大減近兩成，中電仲跳出嚟話如果用呢個計法，2016年會賺少咗21億元，咁都幾嚇人，不過再睇真啲，呢啲只係講咗最差狀況，實際未來政府叫咗兩間公司用多啲乾淨能源，准許佢哋加大投資，係投得多、賺得多之下，相信兩間電力公司影響唔大，甚至仲可能慢慢賺番仲多，而且仲可以一玩就玩足20年，真係除笨有精。
有茶友笑言，早前金管局推出個終身年金，買咗嘅市民要收足15年先回本，估計回報率係3至4厘，而家政府俾牌兩間電力公司，同樣係15年，俾佢哋嘅回報高咗成倍，證明佢哋對兩電真係幾好，佢覺得買政府嘅年金，不如買中電仲好喎。政府嘅終身年金俾咗一筆可以收到尾，15年回本後如果夠長命仲可以收落去，茶友嘅講法係用蘋果同橙比較，唔可以咁簡單就俾結論，但佢嘅反應就顯示咗公眾情緒，高官俾電力公司斟掂咗，方案出來後上電台就難免捱吓轟，未來投資機會多啲嘅中電股價就即時彈升咗近1%，報收81.55元，使用清潔能源比例高啲嘅港燈(2638) 信託係協議得益無咁明顯，協議後就跌咗1%。電價唔會大減，佢哋嘅對手煤氣股價都升咗0.5%，報收15.46元，係近期嘅高位。
陸羽仁
金融High Tea 舊文
來源 source: http://hdfin.stheadline.com
