操盤手劄記：炒期油不如吼油股
■產油國減產，石油需求上升，市場供不應求，利好油價。 資料圖片
環球股市喺資金泛濫下連日衝高，呢兩日先開始回氣。港股亦喺衝破25400關後高位整固，成交縮減一成至696億元，只要唔再跌穿前浪頂5月2日高位24773及3月21日高位24656，屬大漲小
回格局。港股市底強，加上香江如此多fund，有望回氣再上。
一帶一路峯會呢頭閉幕，嗰頭港鐵（066）就話有興趣參與一帶一路項目，股價應聲45度角上升破頂，收49.1元，升2.3%。藍籌股中，其實中石油（857）比港鐵更早搶閘「帶路」，目前正與一帶一路沿線19個國家進行50個合作項目。
雖然油價喺50美元關前遇阻，不過，喺加息環境下，除咗賺息差嘅金融股受惠外，商品價格如油價亦會受惠。近30年嚟，美國息口同油價走勢就相當脗合，有如兩生花。點解會咁？關經濟事！皆因經濟擴張引致原料價格上升，亦引發政府加息遏抑通脹；反之亦然。
伊朗周五總統大選、油組（OPEC）下周四開會，都係油市焦點，炒家借消息炒作唔奇，事實上，油價仍然係投機資金之間嘅對賭，消息只係借嚟向對家逼倉！油組老大沙特以減產力托油價，皆因國營石油公司沙特阿美（Saudi Aramco）搞緊上市，油價上升對估值有利。睇嚟油價喺沙特阿美上市前，應該唔會大跌。
產油國減產，加上石油需求上升，國際能源總署（IEA）早前就預計油市上半年會供不應求。高盛日前亦指，到7月時每日供應缺口達200萬桶，現時係造好原油時機；該行預期第四季WTI期油見55美元，布蘭特期油見57美元；瑞銀更牛，睇後者今夏見60美元。
炒期油，隨時好似國泰（293）咁炒燶，不如吼油股。野村指一帶一路開放油氣市場，有助油股降低整體投資組合風險、提升整體資本回報，令股價重新估值；該行話根據首季成績，特別係潛在資產重組，較睇好中石油。瑞銀亦指中石油喺燃氣取得價值嘅潛力被低估。該股現價5.35元，PE19倍。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
