恒地搶地益街坊
2017年05月18日
中環地王揭標，結果令市場有啲跌眼鏡，首先係得主唔係事前熱炒嘅內資，再者係雖然內資無出手，但成交價一啲都唔低，單係地價都要5萬元一呎。有人掟銀彈推高個市，咁就益晒街坊，高價奪地嘅恒地(012) 跌咗1.5%，報49.45元。受益嘅街坊新地(016
) 就升0.8%，報116.1元，長實地產(1113) 升1.2%，報57.45元。
今次地王由恒基奪得，天價搶地嘅恒基犧牲小我、完成大我，係公佈結果後股價受壓回落咗，但係中環有地的公司股價就受惠。今次李四叔咁勇搶地，大家有啲愕然，問使唔使咁勇。
港鐵馬主席腳頭好
有熟悉佢地公司的人就話，呢兩年係恒基項目動工同賣樓嘅高峰期，估計未來每年回籠資金有接近200億元，咁多錢返嚟，住宅地咁貴，中環地供應買少見少，有買貴無買錯，而家用232.8億元買塊中環地，基本上唔使兩年回籠資金已經夠找數，咁又使乜驚咁多呢？
本來，四叔買地嘅眼光唔使懷疑，好似早幾年佢高價搶咗山頂嘅大地皮嚟起自己大宅，當時呎價要成10萬銀，個個話超高價，而家呢個價錢已經買唔到。雖然係咁講，但佢出手咁勇，投資者膽汁唔夠點都會窒一窒，相反本身係中環有靚地嘅大業主，股價就坐順風車，即時開動。有茶友心水清，話近日好強勢嘅港鐵(066) 唞咗兩日又開車，昨日再創新高，收報49.1元，升咗2.3%。計起嚟，佢都掹車邊都係地王受益者喎。
話說港鐵係好多年前推出香港站招標，講明要畀番啲樓面港鐵收租，所以而家港鐵都有十幾層國金中心，除咗佢煤氣係國金項目都夾咗一份，佢哋都無買貴地，但手頭就有靚樓，都係賣地結果嘅受益者。
港鐵呢排股價咁靚仔，腳頭勁好嘅主席馬時亨係股東會又俾咗貼士大家，透露公司考慮在未來12個月推出6個物業發展項目，而剛在4月接受投標的錦上路上蓋第1期，將提供1650個住宅單位。佢仲話，未來5年港鐵旗下商場預計增加12萬平方米的總樓面面積。
中環茶友聽完嘅結論係，樓市好，港鐵更好，呢排佢咁強勢，股價有啲超買，但如果對樓市有信心，不妨等佢回啲買多少壓吓倉底。
資金續流入科網股
大市繼續係25280水平窄幅上落，恒指收報25293，跌42點；國企指數收報10383，下滑50點，成交696億元。騰訊於公佈業績前向好，周三股價一度高見261.2元，收報259.8元，升0.4%，其他科網股都有資金流入，深港通愛股IGG(799) 升6.3%，報12.74元；中國智能(395) 升5.9%，報0.144元；慧聰網(2280) 升2.3%，報7.15元。
遭MSCI撤回納入中國指數的美圖(1357) 就則大插9.1%，報9.8元。收市後騰訊公佈截至2017年首季業績，純利144.76億元人民幣，按年上升57.6%；每股盈利1.54元。期內，若以非通用會計準則(non-GAAP)計，盈利為142.11億元，同比升42%，高於市場預期賺124億至138億元。
陸羽仁
金融High Tea 舊文
來源 source: http://hdfin.stheadline.com
