Money Walker：中外資金對港股卻步有因
■內地股民對本港莊家搵笨招數有所聞，故對投資港股存戒心。 資料圖片
先係中金出報告羅列66隻本港疑似老千股，再來有David Webb於個人網站上載「50隻不能持有的港股」關係圖，加上沽空機構狙擊個別科技股，外人唔知
仲以為港股地雷處處，十面埋「伏」，不宜沾手。
港股淪為大戶抽水樂園已久，本港股民對老千股同莊家股早有提防，不過原來內地投資者亦被本地老千股嚇窒。深港通開車前，市場一度熱切憧憬本地細價股獲北水青睞，但筆者通車前曾經同一名與內地投資者相熟嘅本地基金經理傾過，佢話內地人對本港莊家股嘅配股、供股、合股等搵笨招數已有所聞，因此連帶對透過深港通參與本港細價股亦存在戒心。
市場之前擔心港股A股化會拖低港股質素，但諷刺在今時今日，A股化並非中外投資者對港股扣分嘅主因。監管當局規管不力、莊家毫無節制抽水，人人都抱住自己搵錢為上你死你事嘅心態，造成妖股橫行嘅局面，先係外界對港股卻步嘅元兇。
港人自己唔爭氣，斷送國際金融中心聲譽就固然，不過諗深一層，香港搵錢機會越見罕有，金融或相關行業都不復當年勇，大概亦係莊家及相關人等為搵錢不惜放棄底線嘅原因。但無論因果關係如何，情況長此下去並進一步惡化，港股只會更難吸納中外資金流入，落入邊緣化困局。
El.
http://fb.com/moneywalkerhk
本欄逢周三刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
El.
Money Walker - El. 舊文
來源 source: http://hk.apple.nextmedia.com
