恒大員工夢成真
2017年06月06日
昨日最矚目的股票仲係隻恒大(3333) ，上周初佢大力夾上後，係高位徘徊，昨日再度發力抽高，股價再創新高，今次好明顯係大撼大。恒大全力扯上，再升11.3%到15.9元，擺明係要擊落空軍祭旗，唔夾死人唔收工。
恒大作為一間市值已經兩千億元，每
年賣樓量有三、五千億元仔嘅大型內房，可以動用嘅資源絕對唔少。今次佢加埋街外之力夾上，都有唔少外資大行出嚟幫佢助威。
繼大摩之後，瑞信上個星期尾就發報告，話明白中國恒大有機會回A股上市對股價有正面影響，但回歸A股時間表並未確定，但目前市價已等同其每股資產淨值，或2017年市盈率21.5倍，看來過高，因此維持對該股「跑輸大市」評級，但仍然上調目標價是因為業務前景更佳，係大行咁樣打鞭，隻牛咪飆得仲癲，結果恒有昨日逆市飆咗1.62元，報收15.9元，市值暴漲逾一成，單日增值逾200億元。
高管認股食胡賺過億
恒大咁升法，中環茶友間傾起，都話夾到唔識睇。我話正路嚟講，佢升得咁急當然回吐嘅力好大，但呢啲夾倉格局唔可以用常態嚟睇。以呢兩年嘅經驗，通常呢啲夾巨倉唔係咁快分出勝負，夾人者固然唔留情要夾死對方，沽空者都唔會咁易認輸，有實力就不斷補倉都你鬥，大家搏命，通常唔會咁快分勝負。
散戶喺呢啲情況，如果短炒無論係睇好同睇淡，都要預咗佢會有好大波幅。有中環茶友話，係呢啲狀況通常最開心係小股東同員工，聽聞有啲恒大嘅高管都借機沽貨套咗現。
恒大一向都係戰鬥格，睇佢係樓市搶市場進取非常可見一斑，其他好似搞波、搞金融產業都係咁，做恒大高管要頂得住老闆進取嘅要求，並唔容易，佢哋係公司上市時已經分到認股權，有啲仲認咗股，過去幾年公司賣樓勁但股價升幅唔大，都食唔到大胡，結果今次狙擊空軍股價爆上，就真係食到大茶飯，聞說有高管沽股套現有成億元落袋，對打工仔嚟講認真係夢想成真。
港股大勢就觀望外圍，美國上星期數據轉弱，但滙控(005) 旗下滙豐銀行亞太局顧問梁兆基表示，6月加息機會有90%，加息四分一厘，相信6月會是2017年最後一次的加息。係加息前夕個別金融股偷步炒上，本地銀行嘅恒生最高抽上165.9，收報163.9元，倒跌1.1元，大新金融(440) 創新高收62.95元，勁升2.8元，同系大新銀行(2356) 收16.62元，升0.54元。
大摩見好轉睇28000
港股就先升後跌，恒指高開52點，報25976，開市初段即上試26000，曾高見25998，最多升74點，但早市中段已出現倒跌，失守25900，其後媒體相繼引述大摩將恒指目標由26000調升至28000，亦未能令港股扭轉跌勢，尾市跌幅一度擴大，最多跌122點，低見25801，於25800見支持，恒指收報25862，跌61點；國企指數收報10597，下滑69點，成交金額747億元。我就話港股跟外圍升，有無去到2015年大陸喪炒時高位28000咁高呀？
中國神華(1088) 母公司擬與國電集團合併，股價升2.72%報19.66元，為表現最佳藍籌股。吉利(175) 周一續升，曾高見14.74元，再創新高，收升1.55%報14.4元。部份汽車及零部件股亦造好，華眾車載(6830) 升3%報1.05元。
陸羽仁
金融High Tea 舊文
來源 source: http://hdfin.stheadline.com
