珠江西部大有發展潛力
2017年10月23日
中共召開十九大，表面睇冇乜短觀經濟嘅突出政策。上周四係港股1987股災30周年，恒指無端端下跌552點。翌日反彈328點，單日反彈已經有上日跌幅嘅59%，顯示大市基調唔係太差。
正如我上個禮拜提過，睇以往開黨大會後股市走向嘅往績，通常開會前港股上，開完會就跌。恐怕
上星期四有炒友偷步炒跌，有人沽貨少人接貨，就觸發一個小沽貨潮。港股反彈之後，未來可能仲有調整壓力，但喺27800點至28000點應該有較強嘅支持。
大會開完 股市回吐
有唔少朋友問我，十九大對股票投資有咩影響？十九大係中國共產黨全國代表大會，講嘅係五年部署，係比較長遠嘅事情，一般而言對炒股唔會有太大即時影響。今次總書記習近平作出嘅報告，對中國長遠發展有深遠影響。
習大大提出一個新時代概念，預示中國會喺2020年踏入新時代。他勾劃出嚟嘅新藍圖係喺2020年之後，用兩個15年，到2050年，中國建國100周年時，將中國建設成現代化社會主義強國。唔熟悉中國政治嘅人，會對呢啲藍圖目標不甚了了，甚至以為只係共產黨嘅空話，將佢同1958年毛澤東發動大躍進時，提出所謂「超英趕美」嘅口號類比。
政治還政治，炒股睇經濟，主要睇阿爺可唔可以達成經濟目標，政治問題股唔需要太關注。鄧小平喺1980年提出經濟要翻兩番，到2000年，中國人均產值要達到1000美元水平，然後再用30至50年時間，即係去到2050年，中國人均產值達到4000美元嘅小康社會水平。但係舊年中國人均產值已經達到8866美元，提早咗幾十年完成目標，而且比鄧小平原先估計嘅人均產值多咗一倍以上！
單睇往績 管理超班
我哋買股票要睇公司往績，公司過去能夠賺到錢，就比較相信將來都會賺到錢；買股長揸都會睇公司嘅管理層，如果管理層過去成功，就估計未來都較易成功。如果用同一方式睇中國這隻股票嘅話，過去四十年業績的確驚人，不但造就咗大量富翁，亦都令七億中國人脫貧，喺聯合國人類扶貧史上創咗驚人紀錄。如果我哋過去對鄧小平嘅講話信到十足，重注買中國資產，依家已經變成小富。
咁o依家問題就嚟啦，你信唔信習大大話中國可以喺三十幾年後發展成現代化強國？信嘅話，就應該繼續買中國資產；唔信嘅話，就要遠離同中國相關嘅投資，呢個係一個投資大方向嘅選擇。o依家講嘅係超過30年嘅事，肯定係一個長線投資。
我同一個可以去北京列席十九大會議嘅政經界高人傾過，佢係樂觀派。佢話開會感覺習主席嘅支持度好高，認為香港人關心自己同仔女將來嘅前途，要用一個鐘頭去睇十九大嘅報告(我估會睇嘅人萬中無一)。佢話習大大讀報告嗰陣，現場有好多位置，與會代表自發拍掌，今次掌聲最多嘅位置係習大大講到「房子是用來住的，不是用來炒的」，可見房價太高的確係一個大家關心嘅問題。
珠江西部 仍有潛力
高人認為，十九大報告講到香港同澳門嘅部份，話港澳發展同內地發展緊密相連，要支持香港同澳門融入國家發展大局，而粵港澳大灣區建設、粵港澳合作、泛珠三角區域合作都係重點，特別係大灣區嘅發展，更係機遇所在。
高人話即使以樓價而言，內地樓價雖然貴，但睇返區內基建嘅發展，珠江西部城市好似中山、珠海、佛山、肇慶同江門嘅樓市仍有發展空間。未來連接香港、深圳同珠江西部有兩大基建，港珠澳大橋最快今年年底通車，將香港同珠海用35公里大橋同高速公路連接起嚟，行車時間由四個幾鐘縮短到30分鐘。另外香港以北嘅深圳，亦興建緊深中通道，將深圳同中山用大橋同高速公路連接起嚟，深中通道全長24公里，預計2024年通車後，會將原來兩個鐘嘅車程，大幅縮減至20分鐘。
高人話港珠澳大橋同深中通道，大大縮短珠江東西兩岸嘅距離。呢啲巨型基建配合一帶一路同粵港澳大灣區嘅發展策略，將會有好大發展潛力。
過去珠三角嘅東部發展得較好，西部處於內陸比較落後，未來仲有較大嘅發展潛力。佢話屯門樓價依家要萬三、萬四蚊一呎，中山樓價先千幾蚊人民幣一呎，經港珠澳大橋由屯門到珠海過中山只要四十五分鐘車程，樓價差距唔應該咁大。過去珠江西部發展較落後，所以樓價都落後。
中山樓市 大有可為
珠江西部發展亦同一帶一路大計有關，港珠澳大橋通車後，由香港機場做起點，經大橋到珠海，等沿線公路打通後，一直開車到越南只需二十小時。上月香港同東盟十國宣佈完成自由貿易談判，今年十一月將簽「香港.中國—東盟自由貿易區」(或稱「東盟10+1+1」)自由貿易協定。香港、中國和東盟嘅貿易關係加強，將推動比較靠近東南亞嘅珠江西部地區發展。
聽完高人一番話，既有十九大預示未來大方向嘅角度，仲令人更注意港珠澳大橋同深中通道兩大基建對珠江西部城市影響。呢個都勾起我一個回憶，幾個月前同一個金融界高層講起內地樓價，佢話內地大城市樓價升得厲害，但中山樓價仍可留意，特別係深中通道落腳地點(另一個地點係廣州中山地鐵沿線)，樓價有升值空間。只係中山樓市有限購，港人買樓並唔容易。
回頭再講十九大，除咗揭示未來三十年中國發展大方向外，亦有中短期影響，主要有幾個方面。
第一，未來五年中國GDP會保持適度增速。中國要成為現代化強國，但十九大嘅報告冇提出具體嘅GDP指標。經濟學家估計未來三年，中國GDP增速應該唔會低過6%，中國即使想去槓桿，想控制一下樓價，都唔會做得太急進。
第二，高科技、高增值產業係扶持重點。中國要發展成現代化強國，喺科技同軍事上一定會大力投資，特別係喺科技方面。目前主要有兩個方向，一個係所謂嘅工業4.0，即係同工業相關嘅科技，另一個係人工智能同互聯網相關科技，特別係人工智能，係未來全世界尖端科技發展嘅其中一個重點。中國好多資金雄厚嘅巨企，都大量投資搞人工智能，例如三大互聯網巨企之一嘅百度，聽聞已投資300億去開發人工智能，佢哋將會應用喺無人駕駛同其他方面。好可惜嘅係，中國嘅工業4.0或者人工智能相關股份，好少喺香港上市，基金管理公司如果可以多搞人工智能及工業4.0嘅基金喺香港銷售，相信會有一定市場。
新科技新能源長線有空間
第三，同一帶一路相關嘅股份。一帶一路嘅開展一定唔會口講咁快，但正一步一步推展緊。講一帶一路，我們一定會諗起一啲交通運輸股或者基建原材料股。喺全球經濟發展回暖，中國經濟回復一定增速情況下，加上去產能嘅動作，鋼鐵等原材料股本身已有好轉，呢啲走勢對大型國企有利，唔好去炒中小型民企股。
第四，新能源。新能源股近年表現呆滯，主要同美國總統特朗普上台後唔注重新能源有關。不過，電動車同新能源嘅發展趨勢係停不了，中國新時代講環保，對呢啲行業有利。例如太陽能股保利協鑫(3800) ，多晶矽同矽片產量位居全球第一，之前六月插到大約0.72元嘅低位，之後八月公佈業績理想，推動矽片「降本、降價、增產」，上半年純利12億元，推動股價回升，上周五收1.22元。彈得多有回吐壓力，但隨著業績改善，包括保利協鑫呢類領先嘅新能源公司仍有發展空間，可喺回落較多時吸納。
第五，內房。內房板塊近期炒作得好厲害，習主席喺十九大話房是用來住的，不是用來炒的，相信中國會繼續推出調控房價措施。不過房市始終係中國經濟軟肋，因為佔咗經濟好大部份，如果房市跌得太快，會對經濟有好大影響。所以可以估計中國唔想樓價升，但都唔想樓價大跌。唔排除內房股仍有一啲炒作潮，但好難期望會有大發展空間，因為近期升幅已經好大程度發展咗潛質。
總括而言，中國踏進新時代，如果我哋對中國經濟有信心嘅話，就應該特別留意上述提過嘅行業發展，估計未來繼續會有明星股登場。
陸羽仁
金融High Tea 舊文
來源 source: http://hdfin.stheadline.com
