操盤手劄記：翻兜騰字頭等大媽
■港股上周突破29000關後升勢放緩。資料圖片
由眾安（6060）掀起嘅呢一浪新股熱潮，輪到易鑫（2858）登場。喺呢一浪，幾隻新經濟股最墟冚，包括騰訊（700）半邊仔眾安、易鑫，親生仔閱文（772），以及有超人撐腰嘅雷蛇（1337）。敲一敲算盤，
原來雷蛇都同騰訊有合作關係。呢幾隻新經濟股，無論背景、前景都有睇頭。如果你有玩新股大抽獎，眾安、閱文、雷蛇都抽中一手兼即食，以首日掛牌收市價計，唔計使費，已賺10,730元；連同易鑫暗盤最多升近五成，一手賬面賺1,900元計，4隻新股共賺12,630元。相對個人每月收入中位數15,300元，已近乎出雙糧！
中國10月份工業增加值、固定投資、消費品零售、房地產銷售等數據全面回落兼差過預期，預示第四季經濟下行壓力大，觸發中港股市呢兩日獲利回吐，滬指險守3400關，恒指失守29000關，短期整固正在進行。港股嚟到呢個位，高處不勝寒，最好整理下個倉！
港股上周突破29000關後升勢放緩，股份升多跌少，指數重磅股維持強勢，輪流托高指數。最重磅嘅騰訊喺收市後派成績表，第三季多賺69%，好過預期，對港股有支持作用。上周閱文上市，眾安再度炒上；如今易鑫上市，唔排除套利資金亦會轉戰其他「騰字頭」股份，可吼位翻兜眾安、閱文。
事實上，閱文、眾安近日亦先後「升呢」。閱文上周三掛牌收市後即獲富時指數畀fast entry，閃入五項指數。恒指上周五公佈季檢，下月4日生效，眾安亦經fast entry，入圍恒生綜合大中型股指數成份股，意味最快下月初加入滬深港通名單。其他「騰字頭」股份，相信遲早亦會入圍，成為大媽新寵。滬港通本周五就開通3年，連同舊年開通嘅深港通，港股通累計持倉已突破8,000億元，以港股總市值33萬億元計，北水持倉佔2.4%，單計流通市值比例更高。持倉最多嘅股份依次為匯控（005）、建行（939）、工行（1398）、騰訊、融創（1918）。不妨逢低吸納「騰字頭」股份，等大媽加持。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.finance.appledaily.com
