【機會嚟喇】三萬點係唔同啲！（飛雲）（第152期）
2017-11-26 18:30:45
今日，2017年11月22日（執筆之時其實已是23日），恒生指數再度衝破三萬點大關，最高見30199，收報30003，成功收於關上。
足足十年，恒指終於見返三萬點！不經不覺，咁就十年！
如此別具意義的日子，當然要好好想下當年！
話說十年前，即是2007年，我剛剛開始從報道新聞的財經版記者，轉往投資版撰寫股票分析的專欄，之後一做便做了七、八年，直到《策略王》面世！
想起來，自己也當真是好彩可以湊上「直通車」的盛會！親身參與在那一轉中資股的大升市當中。回想07、08年期間，自己其中一隻最有印象的股份，當數華晨中國（01114.HK）！自己於0.9元水平買入，其後股價一度跌至0.2元，我咬緊牙關，捱到華晨升返上1.1元至1.2元間才沽。沒想到，其後很快便升上2元。更加沒可能想到，十年後，華晨的股價係20元樓上，周三收報22.55元。
若然以低位計，華晨於此十年間倒真真是爆升了百倍，說得上是隻百倍股，只是相信沒多少人知道而已！其實，肯俾心機找找的話，如此類的百倍股，其實為數可能也十分不少。單就汽車股而言，便還有一隻吉利汽車（00175.HK），以低位計起上來，升幅更加驚人，由仙升到上今日30蚊，講緊係升過千倍！只是，如騰訊（00700.HK）那樣，基本上沒有大跌過，說得上是一直向上的，就真的是少之又少，但也不是沒有，甚至千中、萬中無一。
就算是以我當年的買入價計算，十年間也累升逾20年，一萬變廿萬，十萬變二百萬，也是極之不錯的！問題是，有幾多人，可以坐住呢架國產車，由兩毛、或者一蚊，一直坐，坐到十蚊唔落車，甚至到而家廿蚊都唔落車呢？所以，以前聽老人家教落，如果真係諗住揸超長線，以求博取巨大回報的，就要去申請實物股票，揸實股。因為真係想沽，要去搞手續，存回入倉，再行沽出，都要搞幾日，最想沽貨的意慾可能已經消退，咁就唔會貿貿然沽早咗貨！
好了，臨尾再想一想當年！話說07年第四季的一個晚上，社長載著我和另外一兩個朋友放工搵地方食飯，銅鑼灣周圍都泊滿了車，市面非常熱鬧。社長一邊揸車一邊說：「三萬點真係唔同啲！」如今，十年過去，恒指又上返三萬點，但市面上又是否如同當年一般熱鬧，我想未必！為什麼？因為，我認為，香港這個國際金融中心正在dying！詳細原因，留待下期再談！
機會嚟喇 - 飛雲 舊文
來源 source: http://www.winmoney.hk
