智取大市：
騰訊短線點利好
■騰訊由低位反彈超過一成。 資料圖片
港股連續兩日大反彈，升股連續兩日過一半，市寬仲要係一個月以嚟最好，即市甚至乎好過港股未跌之前。跌市前港股由騰訊（700）、平保（2318）撐住大市，目前雖然其他個股都反彈，但騰訊、平保升勢並未因此減弱。
講返騰訊，由
低位已唔覺唔覺反彈超過一成，亦收復之前調整跌幅一半有凸。先講短線形勢。喺美息趨升等等各項因素之下，內地融資成本逐漸高企，另一方面經濟復蘇進度亦非預期般理想，內地工業經歷幾個月restocking過程後，發現訂單pick up唔到，於是傳統工業相關股受壓，高槓桿、毛利波動性大嘅商品股被融資成本高企呢個因素夾擊，跌到阿媽都唔認得，中鋁（2600）由今年高位7.55元打落去、反彈兩日都未到5元，就知沽壓有幾大。再者，最近又有美國稅改班師回朝預期，公募基金想減持A股而帶來港股全面急調整。不過，北水想增持港股始終係大趨勢，於是跌到足夠反映負面因素後，港股就反彈。
騰訊點解受惠目前形勢？原因係佢經營現金流超強勁，融資成本基本上唔關佢事，工業復蘇樽頸更加同佢無關，侵侵稅改單嘢影響中資科網股資金流，但連升過後已足夠反映，基本上短期嚟講已冇乜負面因素關佢事，唯一係市場嫌佢貴，長線嚴重超買。跌市前佢捱到最後一條梯隊，連佢都頂唔住就港股全線急殺落去，但港股反彈時佢亦係較快較強嘅一批打返上去，短線大形勢下，相信騰訊較保守亦能上返高位附近。嚟緊會講嚇少人提及嘅騰訊長線關鍵因素。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.finance.appledaily.com
