雷軍有橋 未識搵銀
2017年12月05日
外圍科網股乏力，港股昨日先插後彈，跟沽就中招，股王騰訊(700) 先跌後回升，港股都跟住上彈，可見科網股對大市氣氛影響都幾大。有消息話，喺內地科網界幾有名的小米，有可能喺明年來港上市。中環茶友的話題就係，小米有意上市，咁佢名下的金山軟件(3888
) ，會唔會有炒作概念呢？
小米錯過估值高峰期
曾經何時，小米在內地鼎鼎有名，坦白講，陸羽仁對佢都相當欣賞。在小米手機最當紅年代，好多人曾憧憬佢上市，可惜當日佢無利用呢個窗口，錯過咗最佳上市時機。o依家內地手機，若論高檔路線，好多人會諗起華為，若論普及就會諗起OPPO呢啲品牌，小米有小小高不成低不就，所以市場對佢的要求都變得高咗。
據外電講法，小米o依家同投行傾緊，要求最少500億美元(約3900億港元)估值。3年前小米做過融資，當時估值460億美元(約3588億港元)。時移世易，投行覺得要價太高，暫時唔確定做唔做到500億美元的估值，更加唔好話之前有啲高層想要1000億美元估值目標。
小米估值幾多，呢個係藝術問題，主要睇兩樣嘢。一係市況，若然市況好當然萬事好商量；若然科網股熱潮爆過咗，咁就難講了。
再者，就係睇小米自己的號召力。早幾年小米在內地火紅，當時若然上市就會值錢好多，依家小米喺內地唔再咁強勁，管理層大力開拓印度市場。加上蘋果近年俾人感覺係高增長難持續，令到整個手機股估值都受影響，所以除非佢上市時大家炒印度概念炒得好緊要，否則小米要高估值都唔係咁易。
喺內地科網股猛人中，雷軍係其中一個人物，但近年風頭明顯收斂，有點俾三馬比下去的感覺。但雷軍做企業其實好有創意，好似小米手機同小米手環，都同時創造出一時熱潮，佢近年風頭弱咗，某程度同佢運用資本市場唔係咁到位有關，可能呢樣嘢都反映雷軍唔係咁在意搵錢。最簡單嚟講，小米手環喺內地掀起過強勁熱潮，以一種咁普及的科技產品，理應可以帶來好強勁的經濟效益，但到依家為止，似乎雷軍就無好在意咁發展呢方面的收益，由於佢做資本市場上的運作同埋經濟效益的回收，自然慢慢影響咗佢嘅影響力。所以如果小米能夠上市，對公司嚟講係好事，尤其如果上市後能夠增加對營運效益推動，令公司能夠用創意搵大銀。
個市仲未曾穩定
對投資者嚟講，雷軍可以係好有爆發性的企業家，但亦有明顯改善地方。小米話上市，金山軟件股價昨日升咗1.8%，收報22.8元，但相信同消息唔係有直接關係。睇番金山喺2007年上市，掛牌價唔夠6元，現今翻咗4倍，數字唔叫得做差，但佢喺2014年已經見咗高價31.3元，當時市場炒作佢會注入小米，呢個預計至今未實現，市場亦慢慢對小米熱情冷卻，亦都解釋咗點解買金山軟件，回報低過騰訊咁多。從呢個角度嚟講，金山依家股價未有再炒作雷軍概念。至於小米係咪買得過，就真係要睇佢市值高低。
科網股估值係藝術，唔好講話小米未上市，就算上咗市的騰訊，呢排急升快跌都令人睇到眼花，昨日佢單日高低波幅達20元，最低見377.2元，曾挫2%；雖然其後曾反彈3.3%，但未能維持至收市，收市僅升0.88%報388.4元，成交額179.42億元，貢獻恒指24點升幅，睇嚟佢仲未係咁穩定。騰訊郁上郁落，指數都跟住穿梭，恒指一開見過28803的低位，午後最多曾漲269點，高見29343，恒指收報29138，升64點；國企指數收報11518，上揚68點，成交金額1086億元。
陸羽仁
金融High Tea 舊文
來源 source: http://hdfin.stheadline.com
