舊經濟股熱炒再膨脹
2018年01月05日
港股再創10年新高，終於輪到舊經濟股發威，「三桶油」在油價攀升下全線上升，成為藍籌股亮點。
踏入新年頭，全球指數普遍向好，美股上日全線向好，日股喺新年接連向上，昨日大升咗3.3%，大陸A股都造好。有中環茶友問，係乜嘢推動呢輪全球升市呢？我
覺得其中一樣嘢就係炒全球再膨脹，呢個亦係特朗普治下好重要的經濟政策同現象。
特朗普係舊派人，他的很多想法都係沿用比較傳統的思維，最明顯係退出巴黎氣候協議，認為咁樣有利石油業，可以創造就業。雖然佢呢啲諗法有部份過時，但有部份就發揮咗影響。舊經濟一個刺激經濟手段，就係利用增加貨幣或者財政政策去刺激增長。特朗普提出的稅改，正係用財政政策去提振經濟的手法。雖然美國政府聲稱減稅帶來利好增長的作用，可以平衡收入減少，但好多分析都認為措施真正效果會令財赤增加，咁即係政府谷多咗錢出市面，令企業或個人多咗錢喺口袋。咁做客觀效果係令到通脹長遠上升機會增加。
三桶油新年發威
睇番自從美國稅改擺上議程，油價以至於其他商品價格都開始有炒作，喺稅改通過後，呢個跡象仲明顯。從基本因素講，好多分析家長遠唔係咁睇好油價，皆因全球汽車業都開始認真推動電能車，令燃油需求出現陰影。
不過，特朗普係典型共和黨人，對中東採取鷹派作風，新年前仲擲個重量級炸彈落區內，承認耶路撒冷係以色列首都。呢個做法喺國際間惹來指責，但特朗普唔係好似外界睇得咁鹵莽，佢咁做一來可以轉換「通俄門」調查視線，同時贏取到不少猶太政治盟友，客觀上都幫咗油商一個大忙，呢個亦都係傳統的共和黨做法。
美國推動稅改，成為特朗普催谷經濟再膨脹的新力量。在呢種政策下，舊經濟股都會得益，當政府花出來的錢喺銀行體系滾動，推高油價、股價，對石油股有利，資產價格上升，銀行條數大咗，同樣容易搵錢。長遠而言，再膨脹會令通脹升溫，加大息口上調壓力，但當呢個痛苦未來臨前，市場會浸沉喺暖洋洋的氣候之中，吹得股民薰薰醉。投資市場從來唔可以太理性，亦唔能夠永遠掛住遠憂，今日有得炒，好多人就會炒住先，尤其係基金經理用人家的錢來搏殺，就更加唔使手軟。
三生製藥及時公佈好消息
全球股市向好，內地A股五連升，不過午後升幅收窄。港股都唔蝕底，恒指收報30736，升175點；國企指數收報12203，上揚114點，成交金額1318億元。騰訊(700) 再升2.3%，收報431.8元；最搶眼的「三桶油」中，中石油(857) 急升5%，收報5.78元；中石化(386) 急升4%，收報6.14元；中海油都升3.8%，收報12.06元。油股好、相關油股股通常都會炒得仲勁，海隆控股(1623) 爆升18%、宏華(196) 升14%、中海油田(2883) 升11%、安東油田(3337) 升9%、中石化油服務(1033) 升7%。
呢排藥股都幾當炒，三生製藥就及時拋出好消息，公佈推出醫療糖尿的新藥，亦是中國首個胰高血糖素樣肽-1(GLP-1)受體激動劑周製劑，正式獲得國家食品藥品監督管理總局批准，股價高收16.94元，創出一年高位。
糖尿藥在內地需求龐大，三生股價喺消息前已經炒上，唔排除消化後仲會再升。
陸羽仁
金融High Tea 舊文
來源 source: http://hdfin.stheadline.com
