【實力取勝】狗年股市啟示（陳承龍）（第164期）
2018-2-18 9:00:24
炒股嘅時間過得特別快，話咁快又一年，狗年已經係創辦咗《港股策略王》以嚟嘅第四個農曆新年，先祝咁多位喺狗年逢狗衝必贏，買牛即升，買熊即跌，總之順風順水，炒股當出糧啦。
小弟呢本書有個傳統，每年農
曆新年都會搵《通勝》第一版春牛圖⋯⋯對落嘅《地母經》研究一番，睇下有冇啟示。《地母經》係以六十甲子嘅循環為排列，一首詩係一個占蔔，用嚟預料農作物生產情況，戊戌狗年嘅地母經係咁嘅：「耕夫漸漸愁，高下多偏頗，雨水在春秋，燕宋豆麥熟，齊吳禾成收，桑葉初生賤，蠶娘未免憂，牛羊逢瘴氣，百物主漂遊。」以為農業社會，冇諗過呢啲嘢會用嚟預測股市，小弟解嚟玩下㗎咋。 首先「耕夫漸漸愁」嘅「耕夫」就係投資者，狗年一立春，恒指就跌到七個一皮，梗係愁啦。「高下多偏頗」係有人賺到笑，有人輸鑊金，出現呢個市況，多數都係大升市或者大跌市，好友同淡友對決，一係睇中曬一係睇錯曬個市，希望狗年係前者、即係大升市啦。「雨水在春秋」就話春秋兩季多風雨。 重點嚟啦，「桑葉初生賤，蠶娘未免憂」係點解呢？「桑葉」就係新股IPO，港交所（00388.HK）好多時一放就好多隻一齊上市，咁多新股喺市場搵資金，股票價格咪賤咯，「蠶娘」就係殼主，市場供應多咗，或多或少都會影響殼價。講開又講，新股有時多還多，識炒都知係炒供求，我哋《港股策略王》好多時都係叫大家入飛抽新股，一上市就獲利，好多時都會唔錯嘅表現。最後「牛羊逢瘴氣」，可能牛熊證同窩輪市場會比較競爭大。
小弟解《地母經》都係亂嚟，大家睇完得啖笑就好啦，至於狗年有咩投資展望，下期再寫啦。
實力取勝 - 陳承龍 舊文
來源 source: http://www.winmoney.hk
