一路一帶：荒謬的財政預算案
■政府過千億盈餘，依然不派糖，卻綜援出三糧，免差餉、派錢給海洋公園送飛，簡直荒謬。資料圖片
財政司今日公佈新一份財政預算案，全民期望的派錢欠奉，新一屆政府過千億盈餘，都依然不派糖，連基本的電費補貼都冇，但卻綜援出三糧，免差餉、派錢給海洋公園送飛，簡直荒謬。
財爺陳茂波家族經營劏房生意（其實係佢同老婆，被踢爆後將名轉給家族），筆者已深信其不會推出任何壓制樓價及租務市場的措施，的確一如所料，樓價今年繼續會升。新一份預算案派糖都冇，對基層無甚承擔，對夾心階層一樣，免四季差餉，即係收租業主（即係陳茂波家族），一個物業最多一年袋1萬，但劏房波卻唔肯派6,000元給住劏房的租客、街邊執紙皮的婆婆。自住納米單位嘅「上車客」，又未知享盡每季2,500元的減免。
講埋近年蝕大錢的海洋公園，其實每年都一直派飛畀社福界人士，政府煞有介事地宣佈派3億成立教育基金，由海洋公園負責，送1萬張飛畀學生，以現時全港學生計，即大約67位學生爭1張飛，仲難考入大學呀喂！1張飛嘅表面成本要3萬元，已經有市民同筆者講，3萬足夠一家大細飛一轉日本……講咗錯，飛一轉上海、北京去親近祖國啦！
財爺又豪花500億支持創科，但有200億用在落馬洲河套區港深創新及科技園，又係另一個大白象工程。
仲有，喺爭議聲中，財爺終於再為電動車減稅，但只係25萬，一邊支持創科，但又唔支持綠色新能源。其實財爺很多新理財哲學，都好矛盾。有學生向筆者反映，幾年前做學生時，派6,000元冇佢份，到幾年後的今日，學生獲2,000元又冇佢份，佢非常質疑自己作為香港年輕人的存在感。
林鄭選舉時都識得派500元畀街邊的婆婆（假乞兒），點解陳茂波卻唔肯派錢畀香港人？筆者眼中，睇到嘅，唔係「用得其所」的預算案，而係自相矛盾的預算案。
斯郎
https://fb.com/oneroadonebelt/
斯郎
~TITLE_S~一路一帶 - 斯郎 2018年3月1日 舊文
來源 source: http://hk.finance.appledaily.com
