中環在線：呂志和：香港單位細 好彩港人慣
■呂志和出席業績會又有金句放送。
繼記者月薪有4萬之後，嘉華（173）主席呂志和又有金句放送！不過今次就貼地得多，只係踩香港單位細，話去到外國，見到人哋間屋後面有咁大塊草地，佢都深深感受到係幾咁唔公平！
佢仲話，香港樓價都幾高，而且單位細到不
得了，得嗰200至300呎，同一個位置又要做廳又要做房，不過好彩香港人都開始慢慢習慣。講到香港人適應力咁強，華華聽落都唔知好嬲定好笑。
查實呂志和每次出場，大家都自不然追問樓價、單位大細嘅睇法，而佢上次就「中伏」顯得自己有點離地，竟然話記者每月人工有4至5萬，仲話「大家畀幾個月頭嘅人工」就夠畀首期。
自謙中型地產商
唔知係咪「中伏」得太多，佢家陣答問題都顯得有啲保守，好多都話「唔敢答」，問佢點睇海航集團買落嘅啟德地皮，佢就話恒基地產（012）買咗而唔敢答；問佢點睇澳門會唔會有第7個賭牌，佢又話政策問題唔敢亂答。
不過佢金口一開似乎有鋪癮，慢慢講到集團冇同海航接觸過，又話澳門「個個（賭場）起得咁靚咁好，有咩理由唔畀個牌人」。講到新世界發展（017）推「新世代首次置業計劃」，佢直頭自謙話，佢公司只係中型地產商，暫時做唔到。都話呂志和係傳媒甜心，唔講唔講都會講。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
