港交所搵銀方程式
2018年03月01日
港股狗年升升跌跌，基本上喺三萬點樓上浮沉。美股前晚回落，杜指急跌299點，港股昨日跟住下插超過500點。恒指收報30844點，跌423點；國企指數報12382點，跌264點。話咁快2018年又到季尾，市場估計三月美國有可能加息，市場仲開始炒吓美
國會唔會喺今年內加息四次，令美股老牛變衰。
美國鷹蹤嚇窒老牛
美國聯邦儲備局換主席，鴿派領導人耶倫被叮走，新上場的鮑威爾動向不明。從佢出席眾議院金融服務委員會聽證會，表示美國經濟持續強勁，通脹率有機會上升，雖然他期間對加息一事隻字不提，但市場開始炒作佢他不排除今年四度加息，令美債同美股即時受壓。
美股去年喺特朗普效應下超升，有人話若然美國繼續升溫，恐怕捱唔到特朗普任期完結就有可能放緩，要壓住呢個勢頭，聯儲局可能要放一放鷹先掂。從美國近期經濟數據表現同儲局表現，呢個估計都可能近磅。若然係咁，美股老牛就算唔死，可能都只能係跌跌撞撞。
香港情況比起美國就好啲。陸羽仁同商界猛人食春茗，佢估計今年香港出口會有6%增長，內地經濟保持穩定，對香港都有扶持作用。財政司司長陳茂波發表新一份《財政預算案》，雖然無直接派錢，但都大力派糖。若論贏掌聲，當然係直接派錢最有效，不過O依家佢用直升機派糖，退稅及差餉寬免等短期措施，短期對經濟起到刺激作用，估計可以提振經濟增長約2%，今年增長介乎3%至4%，以成熟經濟嚟講市道算好好。
以政府財稅措施嚟講，力度相當唔細，反映佢派糖都幾甜幾大粒。消息人士說，期望大家聚焦長遠措施，未來要有足夠稅收應付人口老化，政府需要應使則使。雖然係咁，股市同實體經濟好多時未必直接掛鈎，尤其港股必然受美股影響，如果美國隻老牛弱弱哋，香港點都會受影響，所以都係要維持今年股市至少在上半年都係大型上落市，個市試底時可以入啲貨，到反彈就要睇位食胡。
大公司宣佈業績，昨日有銀娛(027) 公佈去年度全年業績，純利按年升67%至105.04億元，高於市場預期，每股盈利為245.1仙；派特別股息0.41元。連同前兩次派發之特別息，合共派息1元。港交所(388) 2017年全年業績股東應佔溢利74億元，按年增長28%，每股基本盈利6.03元，末期息每股派2.85元。股價昨日隨大市下調，收報284元，跌2%。
跟住改革消息炒作
去年港交所收入及其他收益131.8億元，按年增長18.6%。營運支出按年增加3.2%至35.66億元。期內收入115.74億元，按年增加11.3%，其中交易費及交易系統使用收入增長9.7%至48.56億元，聯交所上市費收入增長22%至13.33億元，結算及交收費收入增長14%至26.91億元，存管、託管及代理人服務費收入增長4.1%至8.92億元，市場數據費收入增長5%至8.57億元，其他收入增長11.6%至9.45億元。
去年港股平均每日成交金額882億元，按年增長31.8%。第四季平均每日成交金額1073億元，首三季則分別為743億元、778億元及932億元。從數字嚟睇，今年交投收益仲有增長空間。港交所主席周松崗表示，港股喺2017年走勢強勁，尤其是第四季，日均成交金額過千億元，憑着落實市場互聯互通戰略，港交所繼續受惠滬深港通資金流入增加，在邁向成為跨資產類別全球首選交易所目標上取得重大進展。港交所股價係睇前景多過睇業績，內地經濟發展進入資本市場驅動，呢樣嘢對港交所有有利。未來佢會不斷有市場改革消息，股價有可能會跟隨消息炒上炒落，好似上星期港交所推出同股不同權諮詢，股價就炒咗兩日，跟住呢個節奏出出入入，會係買賣呢隻股今年的搵銀方程式。
陸羽仁
金融High Tea 舊文
來源 source: http://hdfin.stheadline.com
