金融High Tea 2018年4月13日
港元加息步聲似漸近
2018年04月13日
港股兩日反彈過千點後，昨日先升後軟，咁樣走勢都算正常。股市今年受不穩定地緣政治同利率向上影響，暫時睇唔到有大升條件，個別炒上落都仲係短期主流玩法。
夜後傳來金管局入市買咗8.16億港元，以維持聯繫匯率穩定，如果情況持續，港息就有上調壓力。
港股四連升昨日斷纜，恒指高開逾百點後受制於31000點；午後主要受騰訊(700) 、友邦(1299) 及銀娛(027) 向下拖累，三隻股份合共拖低恒指100點，恒指跌幅進一步加深，最多曾跌260點，低見30637點，臨近收市走勢略為回穩，恒指收報30831點，跌66點；國企指數收報12288點，下滑35點，成交金額1009億元。騰訊連升四日後現疲態，收跌1.5%報413.2元；近日造好的友邦回吐，跌1.4%收報70.6元；銀娛在菲律賓長灘島興建賭場項目或擱置，拖累銀娛挫近3%收報70.85元，係回吐最多藍籌。
亂局有利油股板塊
呢兩日美國總統特朗普擺低同中國貿易牌局，走去同俄羅斯強人普京拗手瓜。特朗普上任以來，先後同北韓金正恩、中國習近平打過口水戰，O依家喺敍利亞毒氣襲擊上同俄國過招。喺咁多條戰線中，同敍利亞動真格郁手機會最高。美國共和黨一向係油商同軍火商好朋友，喺新能源興起下，主要產油國沙特想將油價谷上80美元，藉此將國家油公司沙特阿美上市，美國喺中東打打仗，客觀上益埋沙地。
石油股普遍造好，中資三桶油全部造好，中海油(883) 急漲3.7%，收報12.46元；中石油(857) 升3%，收報5.69元；中石化(386) 微升0.41%，收報7.43元。油服股升幅仲大，中海油服(2883) 升6%,收8.53元、安東油田(3337) 升2.3%。業界提醒油價高升，要提防頁岩油供應回升，只是呢個板塊目前受政治因素推動多過係基本因素。特朗普對俄國加強制裁，在政治經濟上都諗得過，相信呢局牌佢會有興趣玩落去。
美國砌俄羅斯，戰線唔止一道。早前美國財政部外國資產管理辦公室公佈把俄鋁(486) 老闆歐柏嘉列入制裁名單，令俄鋁股價大跌，市場形容歐柏嘉躺着也中槍。俄鋁中槍，拉動咗全球鋁價向上，其他鋁業股就不跌反升。
俄國雖然係能源大國，但工業近年萎縮，俄鋁係少數國際級公司，主要係俄國有大量廉價能源，產鋁成本甚有優勢，但鋁業係全球競爭，風險相當高，過去俄鋁都曾經試過財政危機，要俄國政府打救。俄國長期與西方關係緊張，俄鋁雖然與政府關係良好，但歐柏嘉長袖善舞，日常表現都唔敢同俄國政府行得太埋，反而經常同歐美政要打交道，早前佢成功拉攏全球金屬交易商嘉能可高層入局，同時研究換股，西方媒體對於佢呢次被納入嚴厲制裁名單，都有啲同情聲音。
炒俄鋁蝕得起先好買
有說法認為美國政府整治歐柏嘉，同大力打擊鋼鋁產品入口政策配合，目的在保護美國鋁業。
呢次俄鋁成為制裁犧牲者，歐柏嘉帳面財富起碼唔見一半。俄鋁股價經過兩日大跌後，昨日反彈咗6%，收報2.19元。俄鋁股價跌到咁殘，有茶友問點睇？是否可以撈貨？今次俄鋁被制裁，範圍和力量都好大，基本上只要係用美元計價交易，都有可能遭清算，同時美資有關的金融機構喺五月後不能再持有相關股份。消息公佈後，英國倫敦金屬交易所(LME)都停咗俄鋁名下各國品牌鋁錠交易，令到鋁期飆升，有傳聞連俄鋁本身見事態嚴重，主動提醒主要客戶相關風險以免累街坊。俄鋁被株連，必然嚴重影響公司流動現金，俄國政府表明會考慮支持，具體方案仲要研究。
從牌面睇，俄鋁係巨型企業，本身有相當競爭力，不可能一下子被整垮，呢個係俄國政府不容許。俄鋁當年在香港上市，大陸政府都默許支持，所以佢有一定政治本錢。不過俄鋁的政治本錢，基本上係挺住公司唔倒閉，至於商業上要賺錢，始終要公司克服美國圍堵，呢樣嘢考驗歐柏嘉交際能力，同時仲需要時間。O依家俄鋁股價都好吸引，但估計喺五月前會受消息同美資減持影響波動，所以要炒呢隻股，係高風險高回報。
陸羽仁
金融High Tea 舊文
來源 source: http://hdfin.stheadline.com
