魚樂無窮：吼實兩隻新低股
■李澤鉅揸旗的長江基建，股價貼近一年低位，股息近四厘，食息一族可留意。資料圖片
殼股市場突然熱鬧，上周五起短短三個交易日，已有四隻股份宣佈易手，包括越南河膳源（1632）、兩隻建築股劍虹（1557）、SHIS（1647），以及再度賣盤、前稱民生珠寶的錢唐控股
（1466）。股價升幅以倍計，冇貨的肯定心癢癢想分一杯羹，記住入場炒唔係問題，最緊要有心理準備唔係贏梗，仲要時刻緊貼市況，嚴守止賺止蝕，否則我勸你食花生算了。
長和系股東會接連舉行，即將接棒的李澤鉅再被問是否準備好，他直言回答這個問題三十幾次，潛台詞係唔好再煩我。冇計，你老豆係李嘉誠，相信嚟緊三五七年都會活在超人陰影之下。講開又講，佢揸旗的長江基建（1038），股價已貼近一年低位，股息率再度挨近四厘，食息一族最佳shopping時機也！
講股價回落，另一地產王國新地（016）旗下新意網（1686），自年初升呢上主板後，股價拾級而落，最新亦創一年新低。點解走勢咁肉酸？我覺得係之前炒得太癲，而家去番合理水平。
事實上，集團中期核心盈利增長11%，將軍澳旗艦數據中心MEGA Plus全面啟用，最新亦投得荃灣地作擴軍之用，股息率有3厘，係時候分段吸納了。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
