港交所未炒得入摩概念
2018年05月10日
美國宣佈退出伊朗核協議，國際油價顯著上升，帶動「三桶油」向上，升幅居重磅藍籌股前列，中石油(857) 急升4.4%，收報5.95元；中海油(883) 升2.3%，收報13.52元；中石化(386) 升2.2%，收造7.88元，三股合
共貢獻恒指48點升幅。我一直睇好油股，認為佢哋上升周期未完。
其他重磅股普遍造好騰訊(700) 收漲1%，報394.6元。醫藥股表現不俗，中生製藥(1177) 升4.5%，收造18.66元；復星醫藥(2196) 上揚2.2%，收報45.75元；上海醫藥(2607) 升1.6%，收報22元；國藥控股(1099) 收升1.4%，造33.55元，基本上係繼續跌後炒反彈格。
半新股炒賣盤要計派彩
除咗石油股同醫藥股向好，其他股份都係炒吓消息，唔少股仔趁機郁郁吓，脫離咗半新股行列的SHIS LTD(1647) 早前停牌，跟住宣佈賣盤。買家以總代價6.53億元，向控股股東購入7.5億股，佔已發行股本約72.3%，並以每股現金0.87元提出全購。每股要約價較停牌前收市價0.99元，折讓約12%。買家將維持該公司上市地位。
SHIS昨日復牌暴升，曾高見2.18元，漲120.2%，收市報1.83元，升咗85%。該股去年三月上市，主要於新加坡提供綜合樓宇服務，專注於維修及安裝機械及電氣系統，以及於新加坡提供建築及建造工程服務。
雖然做建築無乜賣點，但認購反應不俗，不過掛牌炒作一陣就下潛，O依家上市過咗一年就賣盤，呢啲叫種殼，相信往後都有唔少半新股會行呢條路。有股票老行尊話，建築股係近年熱門上市行業，亦係賣盤焦點，皆因佢哋生意簡單，又唔係咁大發展，有盤數可以上市，成功上市後老闆套現上岸係最大目標。呢啲公司賣盤可能已見高峰，小股東亦應該適時套現，又去搵過第二隻炒作。呢類公司上市炒一陣就潛水，要買佢哋就要等股價跌到殘，去番殼價就差唔多，好似SHIS賣盤價八億幾就係一個指標。如果高價跟炒，咁就算買中都無得派彩。
恒指昨日升133點，收報30536點；國企指數收報12185點，上揚40點，成交只有842億元。大市成交減縮下，港交所(388) 公佈第一季業績，收入及其他收益41.5億元，按年升36%，數字相當靚仔，但股價只係微升0.3%，收報257元。睇番首季業績，現貨業務收入及其他收益按年增長53%，達11.3億元；結算業務分部增長37%，至14.87億元；股本證券及金融衍生產品則升91%，商品分部則跌7%。港交所首季市場動力保持強勢，現貨市場平均每日成交金額增至1461億元，按年升97%，交投增幅勝過全球大部份交易所，交易費按年增長96%，呢個解釋咗點解佢首季生意數據都幾好，但股價跟唔上，好大原因係大家見到近日交投縮咗咁多，第二季唔知係咪可以維持。今年第一季指數衝上34000點，每日成交高峰時逼近2000億元，港交所成為大贏家，可惜到咗第二季一開波市況就逆轉，所以首季業績基本上係最靚仔，第二季有機會同去年比持平，但肯定比唔上首季。
港股首季旺勢暫逆轉
第二季業績褪色，港交所不忘提醒大家，滬深港通交易量錄得季度新高，滬/深股通及港股通平均每日成交金額，分別按年升27%及49%，反映內地投資者傾向將投資分散至香港，期望A股下月被納入MSCI新興市場指數後，進一步刺激滬深股通成交。對於呢個期望，陸羽仁覺得有機會好似互聯互通，初期未必咁快會熱得咁緊要。首先入摩係分段進行，初期調整比重，指數基金配置調入資金有限，其他外資就會受中美貿易戰影響，未必敢咁快大手加碼。長遠如果內地投資市場開放，基金逐步增加，交投先至會反映，所以買港交所暫時都要有啲耐性。
陸羽仁
金融High Tea 舊文
來源 source: http://hdfin.stheadline.com
