笑到最後：港樓價再升的誘因
■啟德地王引發全城樓盤反價，皆因高鐵太貴票價，留喺香港做樓奴成本最低。 資料圖片
啟德地王一出，引發全城樓盤反價，樓價再度逆加息周期而上升。點解發展商願意天價投地、小業主勇於加價？背後原因，當然係高鐵票價、手續費太貴，打造唔到真正嘅「一小時生活圈」，最後發
現留喺香港做樓奴成本最低。
全球大都會嘅發展一樣，都係向外擴散。本地人住唔起大都會市區，惟有向郊區置業，打工仔工作日喺市區頹住劏房，假日回郊區與家人享受較舒適的環境。所以爭奪市區細樓購買力的對手，就係郊區大宅。
一如高明所言，全港樓價已過萬蚊呎，香港境內全部市區價，郊區要北上向高鐵沿線搵。高鐵本來應負起平抑市區樓價嘅政治責任。不過，高鐵香港到廣州南票價260元，本來預期隨著通車日近會公佈更多港人優惠，豈料票價不平反貴，原來喺香港買其他車段車票要加手續費，有指達100元。
高鐵至廣州南站，單程票價已經要260元，來回520元，一個月返25日工計算，每月搭高鐵開支已達13,000元。如果有萬三蚊閒錢搭車，不如直接喺香港租樓；若有父幹，只要富爸爸畀首期150萬元，再加每月萬三，已可供間500萬元嘅樓，如果高成數買新樓可買更大銀碼，留港置業，無須辛苦每日來回兩個幾鐘搭高鐵，亦無須搬離父母。
發展商一見高鐵票價連繫唔到「一小時生活圈」，郊區住宅無法同本港住宅競爭，立即針對購買力投地。小業主亦乘勢加價，樓價再升實在要多謝高鐵嘅定價。
如果香港行政長官林鄭月娥有心打壓樓價，應指示高鐵票價：香港人買月票由香港至廣州南，月票開支平過中環去粉嶺。當然，政府、港鐵（066）大把理由，多數忽然搬出自由市場。既然車費按市場定價，樓價亦沒有理由不按市場定價。下次高鐵加手續費、票價勢將成為香港樓價再升嘅因素。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
