中環在線：霍大班被圍 墟冚到打爛嘢
■霍建寧噚日出席同小米合作嘅記招。
超人李嘉誠下星期正式退休，好多人覺得喺「小超人」李澤鉅掌舵下，長和（001）高層遲早有變動，今年66歲嘅聯席董事總經理霍建寧（霍大班），近排就多咗出席以往少去嘅記招，噚日被人問幾時退休，霍大班以一句「講番今日同小
米嘅合作」避開問題。
避談退休
人稱「打工皇帝」、年薪2.1億元嘅霍大班係超人得力助手，大部份時間度橋做大刁，只係業績會或股東會先見到佢老人家。點知呢兩個月，低調開嘅霍大班接連出席同支付寶同小米嘅合作記招，仲唔係億億聲嘅震撼大刁，令到大家疑惑霍大班角色係咪開始有變化。
霍大班噚日神情好輕鬆，喺台上介紹同小米合作嘅因由，後來佢落台親身介紹小米產品，唔知係咪場地太細，又有好多記者想問霍大班，長和會否投資小米，場面逼到好似旺角咁，結果有兩件小米產品被人推冧，霍大班都皺皺眉：「係咁打爛嘢喎。」
霍大班返上台答記者問題，被人問到佢幾時退休，霍大班即刻唔講，話講番今次個「強強合作」，問答過程，霍大班一時幽默，一時又好寸嘴，例如有外國記者問到新聞稿話智能手機喺部份歐洲市場會有「preferential arrangements」（優先安排），具體係點，霍大班竟然叫人「look at dictionary」!
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
