智取大市：港股魚毛變大鱷
■投資者要擺脫魚腩身分，首先分析自己強弱項，然後集中利用強項審慎地下每一注。資料圖片
中興通訊（763）禁令以至華為捲入美國制裁風波，連香港網民都花生不斷。諗起前排喺內地《知乎》網站，一批來自五湖四海嘅網民加入討論，一個PO可以有逾2,000個留言，高汁內容睇
都睇唔曬。結果連登巴絲打都要將《知乎》嘅留言改做廣東話版本出PO，甚至有人當正原創。
中國十幾億人口，每個高人吐啖口水出嚟都不得了，更重要嘅係，今時今日中國各行各業即使未必去到世界頂𥧌，但每個產業總有一定規模，總有行業專家跑出來集思廣益，知識交流令分析達致更高層次。
至於香港，除金融、地產、零售之外，喺其他行業嘅知識形成極大斷層，收集行業行情絕對輸蝕得多，中興例子只是冰山一角。香港將淪為褪色金融中心，但講新一代金融知識同發展，香港更加一早唔係專家了。
內地股票分析趨向專業化，意味住投資港股嘅內地投資者越嚟越強，你唔進步就更容易變成食物鏈低層。要擺脫魚腩身分，upgrade自己嘅知識或增加自己嘅分析工具，實在需時，要更快見效同實際，就先分析自己強弱項，然後集中利用自己強項審慎地下每一注，時刻記住，敵人已經火速地變得比自己強，以後不得不小心了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
