財路：中信平到你唔信
■中信股份董事長常振明。 資料圖片
中信股份（267）由冇行cover，到呢期多咗大行寫報告，到2020年預測PE調整到得番5倍，又係平到你唔信。
中信上年盈利650億元，微增近4%，同樣受到澳礦問題困擾，上年要再為呢壇製作撥備72億元。粗略計數，撇除撥備影響，中信往
績PE得6.5倍，比家陣7.6倍仲要再低啲。中信受澳礦影響，近幾年撥備，似乎已經成為常態，好嘅地方係，澳礦已經撇減近半，中信保守性做法，第時澳礦有乜依鬱，都冇咁傷。
又中信係全國最大綜企，係大到鬱唔到，無新動力，新元素加入，股價長期坐冷板，唔曉鬱。但呢期見，中信開始與時並進，建立咗「中信雲」平台。據管理層講，集團期望未來3至5年，將非金融瓣數盈利貢獻，提高到佔40%到50%，兼將唔醒神非金融瓣數剔走。中信肯鬱，唔再單單側重銀行同證券瓣數，係好事。
場內專業預測，中信2018年到2020年EPS1.65元、1.83元同1.98元，預測PE6.9倍、6.3倍同5.8倍。連改名前中信泰富往績計算埋，中信上市以嚟平均PE約12倍，後年預測PE，比平均PE，平咗一半。又中信成為最大綜企，大行報告寥寥可數。但呢期見，包括美銀美林、高盛，同大摩cover番中信，兼有唔錯評價，當中，美林認為中信估值被低估，及有潛在出售，列入「買入」評級。
買中信，當2020年PE，上番家陣7.7倍，中信現價11.62元，講緊要升33%到15.4元，呢個PE水位，仲係超殘超低搞。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com
