金融High Tea 2018年5月8日
好醫生等馬明哲施救
2018年05月08日
美股上周五喺股神增持蘋果消息刺激下反彈，但對香港科網股同市況影響唔係咁大。港股全日都係升升跌跌，科網股仲係無起色。
本地科網股喺第二季跑輸大市，呢個係近兩年少見現象，股王騰訊(700) 再度逆市下跌，收市跌0.7%，報380元。
唔見主席出嚟打氣
由平保(2318) 分拆出嚟的平安好醫生(1833) 掛牌翌日股價急跌，收報52.75元，跌3.7%，跌穿招股價。佢股價最低插到48.9元，相信係部份用孖展申請投資者止蝕離場造成的效應，喺急插下觸發斬倉，之後沽壓減少，就彈番轉頭。連跌多日的平保微升0.07%，收報74.9元。
用孖展申請新股呢個亦係風險之一。基金喺國際認購，見到反應冷淡，有乜閃失可以縮盤，彈性大啲；但公開認購的投資者，就有機會縮唔切，咁就有啲硬食感覺。散戶用孖展認購睇落好着數，回報率可以好唔錯，但一有不明朗時，就要加倍小心，因為槓桿率咁高，一有轉勢就中招，幾次食埋一次就嘔返出嚟。自從閱文(772) 之後，抽熱門新股回報率逐漸降低，去到好醫生基本已經好大機會損手。
好醫生破底後應該止蝕抑或死守呢？有中環茶友話平保分拆公司上市，但平保生招牌主席馬明哲無乜出嚟賣廣告，咁對股份招徠有一定影響。馬明哲喺基金心目中相當有號召力，有投資銀行家講，馬明哲周時同基金唱好平保，講到公司係科技同金融結果例子，喺佢出力省招牌下，平保股價高處未算高，但好醫生招股，雖然規模有番咁上下，又係公司分拆新作，但馬明哲就無乜出嚟推介，令好醫生少咗動力，所以未來平保同好醫生股價表現，多少都要等阿馬發吓功。通常呢啲大股破咗底，市場氣氛會比較觀望，如果公司無催谷動作，咁撈底就有風險。
美股造好，中港股市都企穩，滬深股市齊升。上證指數收報3136點，升45點；深成指數收報10626點，上漲200點。恒指三萬關得而復失，收造29994點，升67點；國企指數收報11996點，上揚75點，成交金額955億元。舊經濟股繼續有唔錯表現，中海油(883) 漲3%，收報13.46元。零售股繼續炒，莎莎(178) 大升7.5%，收報5.44元，處於全日高位。
舊經濟股繼續領漲
莎莎表現靚仔，主要係公司喺五一三日假期期間，香港及澳門零售銷售按年升34%，內地客營業額增長更達41.5%。生意上由交易量升23.4%及每宗交易平均金額升14.6%帶動，可以話價量齊升。期內同店銷售按年增長31.7%，當中本地客銷售升12.5%，內地客銷售升38.9%。公司話整體表現符合預期，在港消費人流增加，帶動銷售增長，並受惠倉庫搬遷及整合漸見成效。至於毛利率有可接受下調，但毛利金額仍有理想增幅。受惠零售市道復甦，集團對港澳市場未來發展樂觀。
零售股表現強勢，主要係去年起市道見底，利福國際(1212) 主席劉鑾鴻都話，本港零售市道最差時期已過，零售銷售自去年下半年起反彈，以目前數據而言，市場毋須太擔心今年上半年情況。集團在期內表現，就要視乎在本月舉辦的「感謝節」。佢仲話，集團銷售表現高於市場平均水平，受惠內地旅客帶動，尖沙咀分店表現強勁，化妝品銷售可觀，但由於下半年基數較高，業務都會有啲挑戰。
利福昨日股價升1.2%，收報15.1元。三月卡塔爾投資局決定沽售手頭利福股份計數離場，當時條件係以每股12元，配售利福國際約23%股權，較停牌前12.48元折讓3.85%，套現44.53億元；同時亦配售利福中國，作價每股2.03元，配售23%股權，作價較停牌前報2.13元折讓約4.69%，套現7.53億元。當時細劉承諾承接2.8億股利福國際及1.86億股利福中國，涉及資金分別為33.6億元及3.77億元，其餘則由第三方承接，細劉就應承若出售予第三方股份未能售出，他將認購這些股份，可見佢對公司信心。若然當時同步進場，O依家獲利已經有25%，明顯跑贏大市。
科威特投資局係全球最大主權基金之一。去年利福股東應佔溢利回升至33億元，按年增1.07倍，佢喺利福國際股價由低位回升咗20%離場，基本上無乜着數。從細劉呢個故事，說明大股東都係心水清過基金經理。
陸羽仁
金融High Tea 舊文
來源 source: http://hdfin.stheadline.com
