酒店股同人唔同命
2018年05月11日
美國制裁伊朗，等如同油價打強心針，喺油股推動下美股再彈，港股重上三萬點關口，恒指收造30809點，升273點；國企指數收報12233點，上揚48點，成交上番931億元。
產業信託息率高企
呢期大市反彈，領軍唔係新經濟股，而係油股、銀行
股同零售股等舊經濟股。相對個別本地銀行股創歷史新高，零售股亦屢創一年高位，但地產、酒店同樣係舊經濟股，升幅就追唔上，有啲同人唔同命感覺。
地產股受壓可以理解，皆因樓價高企，超越一般人負擔，打壓之聲喺社會再度響起，加上息口攀升，地產股反映後市風險，股價落後相當合理。
酒店股雖然同屬資產股，但今年訪港旅客人數回升，零售業率先反彈，酒店業卻未見報喜。相反，呢排酒店業主會仲走出來同民宿網Airbnb開火，話佢哋違法經營。據講，觸發呢單嘢的底因，係Airbnb想擴大地盤，同部份酒店傾合作，觸動咗酒店業主神經，於是發難炮轟。
早前聽酒店業人士講，話呢期旅客雖然回升，但酒店入住率和房價，同上次好景周期比明顯有差別，之後酒店股真係跑輸大市，咁唔怪得之酒店業主發難。酒店經營無以前咁好搵，另一大因素係政府年前增加咗酒店，供應多咗自然影響房價。呢個係政策因素，同民宿增加無關。
業內人士認為，呢個供求關係變化，對酒店生意影響其實仲直接過民宿網。零售業受惠租金下跌、酒店業就受害於租金無得升，小小差別，結果旅客人頭湧湧，兩者股價就強弱大不同。
睇番酒店股價格，好多數字都好吸引，譬如本地最大酒店股富豪信託(881) ，O依家市盈率只有三倍，息率有六厘，資產折讓有五成。佢股價表現相對算唔錯，距離一年新高仲有4%左右，主要係佢屬於地產信託，派息去得盡，酒店生意好咗，派息點都增加，其他酒店股表現就無咁靚仔，最明顯係隻大酒店(045) ，幾個月前佢借大戶買股消息炒收購，股價升上17元，之後消息不了了之，股價回番落去，O依家喺12元水平浮沉，相信好一段時間都見唔番高位。
呢排市場焦點之一，係首隻同股不同權股份小米集團估值。新浪科技引述消息報道，小米和保薦人將定價定在以700億美元(約5460億元)估值為基準。早前有說法小米想目標估值去到1000億美元(約7800億元)，大幅削減三至四成。但之後不斷傳出估值調低消息，甚至講到估值低於500億美元。若然去到咁低估值，佢係咪願意上市都成問題。《華爾街日報》O依家講法係，小米在IPO中目標估值700至800億美元，同內媒說法較為接近。
小米想上市要接受現實
小米呢啲大股上市唔係咁易，要睇天時地利，如果市旺就梗係順風順水，高價賣股都可以唔憂。現時市況顯然唔係咁，喺咁嘅情況就要睇埋門一腳，個市係咪有足夠承接力，同埋公司係咪願意接受低啲估值，一於上咗先算。
小米預備上市時間係六月，本來有A股入摩因素可以憧憬，但現時美國加息機會好大，對股市影響未明，小米就要接受現實，估值肯定唔可以按本身主觀意願定價。至於調低估值後，係咪可以順利上市，仲要睇係咪揀到個好時辰嚟出世。
陸羽仁
金融High Tea 舊文
來源 source: http://hdfin.stheadline.com
