【實力取勝】珍惜反彈機會（陳承龍）（第187期）
2018-7-26 17:39:39
首先多謝咁多朋友嚟書展捧場，支持小弟嘅策略王攤位同處女作《捕捉股市十年周期》，繼續支持嘅，可以每期買《港股策略王》實體版，同埋交易日上facebook或者YouTube睇我哋嘅直播，支持小弟
作品嘅，就可以去各大書局買《捕捉股市十年周期》。
中美貿易戰呢件事炒咗咁耐，市場終於開始麻木，而且中央開始冷待美國，唔理美國總統特朗普講乜，自己放水畀內地市場，某程度係理掂自己就算，唔理你美國搞乜。呢一單嘢，股民信心真係返咗嚟，市場嘅風險胃納亦提升返，再加上好多股份都跌得太殘，短期咪搏下反彈咯，係咪轉勢小弟都唔敢講。重磅股首選係滙控（005）同騰訊（700），要細股就通街都係，越殘越好博。大家要好好珍惜呢個反彈浪，應該可以炒到8月頭。
寫多兩句滙控，佢依家佔恒生指數比重10%，大戶如果唔夾騰訊，就可能有機會攞隻象出嚟舞。小弟估滙控派中期業績前，有機會大炒，而且佢近年每次完成該年回購之後，股價都會上升，2018年嘅回購差唔多去到尾聲，對股價應該有支持作用。唔好唔記得，平保（2318）之前80幾蚊都有貨，依家滙控有5厘幾息，真係博反彈首選咯。
另外，賭股都望多眼，始終7月8月呢個暑假旺季，賭收數字一定靚，加上大灣區有啲政策將會出台，澳門喺正大灣區中間，點都有優勢，再加上日本賭牌有眉目，點都會炒熱賭股，小弟首選銀河娛樂（027）同新濠國際（200）。
此外，其實好多精選照片，冇擺落《捕捉股市十年周期》，今期喺雜誌登畀大家睇，嗱，所以策略王雜誌好有價值，唔睇會走寶㗎。
實力取勝 - 陳承龍 舊文
來源 source: http://www.winmoney.hk
