中環在線：謎網N集 詠春決戰街市王
■冼師傅噚日開記招，揚言要同鄧清河決一死戰。
獨立股評人David Webb爆出「謎網50」關係圖後，先係康宏（1019）上演「台灣幫」大戰「福建幫」，後有「醫生」同「玩具大王」恩怨情仇，最新有第一信用（8215）前主席冼國林（冼師傅），指控「
街市大王」宏安集團（1222）主席鄧清河涉造市，揚言要「決一死戰」，加埋廉政風暴、證監打大鱷等，中間涉及嘅爾虞我詐、曲折奇情，相信奧斯卡得獎編劇都未必諗到。
稱明年開拍謎網風暴
咁好睇，搞開電影嘅冼師傅當然唔嘥料，打算明年2月開拍電影講述謎網事件，佢編劇，仲話係真人真事改編，到時分分鐘有更多內幕。而冼師傅作為「謎網股」第一信用嘅創辦人，當然會參演其中一角色，至於其他選角，佢就大賣關子。
戲未成事，冼師傅噚日就喺記者會上大數鄧清河，指鄧成為街市大王都係多得佢當年穿針引線。但對方舊年以低價賣出冼持有嘅第一信用股份，「做法離譜，（奪殼）做得太著跡」。因此，佢控告鄧同埋權威金融（397）旗下權威證券（前名為君陽證券）等，追討損失逾2.18億元。
冼師傅亦考慮向證監及廉署舉報，又指事件牽涉全國政協人士，故考慮寫信畀全國政協主席汪洋實名投訴。
不過，一切行動要等佢下月6日回港再作決定，若果鄧清河呢段時間搵佢和解，會唔會考慮呢？冼師傅話唔答假設性問題喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
