大棋局：中國包圍網成形
■美國挑起的貿易戰只係芸芸大國較量手段中的一部份，目的係打開中國缺口。 資料圖片
貿易戰期間提及有一單大deal要留意，就係美國司法部批准德國拜耳收購美國孟山都。鏡頭前默克爾瞋目而視特朗普係做畀選民睇，就像網民譽為垃圾桶代言人的議員大嗌同你
撐到底一樣。結果美歐日關稅同一陣線，而中國被摒除在外。
現在有一點我哋要留意。奧巴馬任內推TPP、TTIP、TISA，以3T計劃孤立中國，係用柔性嘅手段拉中國重回美國秩序；特朗普以貿易戰孤立中國，係用強硬手段逼中國重回美國秩序。關鍵就在，其實兩任總統做嘅嘢一樣，不同的只係手段。說明美國對中國態度之轉變並非在特朗普上任後突變，只係現時中國遇上一個手段雷霆之人。
普京曾經講過，美國每一任總統行事方式不一樣，但原理都相同。如果不看清這點，便容易產生拖到特朗普下台自有改變的僥倖心態。這是貿易上的孤立。
特朗普拉攏朝鮮，令中國東北亞唯一缺口存在不穩定性；貿易戰合縱完成，準備開伊朗波；當開伊朗波後，下一步估計就係南海。
貿易地緣金融被孤立
中國搞一帶一路模仿美國馬歇爾計劃及日本黑字還流，目的在引人養成用人民幣習慣，同時由世界工廠妹轉型為世界地盤佬化解失業及產能過盛問題，最後等周邊國家返轉頭買中國貨。伊朗同南海，就係一帶一路的兩個中途點。當這兩個地方出問題，一帶一路構想將成空。這是地緣上的孤立。
今年10月開始，聯儲局縮表規模會擴大至每月500億美元；歐洲央行預期今年底前會停QE；日本央行傳聞今日（7月31日）會公佈將國債孳息曲線拗上嘅措施；英國央行亦開始陸續加息。世界五大央行，美、歐、日、英、中，前面四個都準備收水，中國因為貿易戰遇挫，方寸已亂，躊躇於要唔要大放水。如果四大央行收水，唯獨中國放水，人民幣匯價將會仆直，人民幣國際化努力亦成泡影。這是金融上的孤立。
當所有人對你孤立的時候，那已經不是孤立，而是包圍。貿易、地緣、金融三路包抄。再次強調，貿易戰只係芸芸大國較量手段中的一部份，目的係打開中國缺口。
中國經過多年做血汗工廠嘅努力，累積3萬億美元外匯儲備。呢3萬億美元係中國能夠在國際上擺款之根本，一旦貿易順差大跌，外匯流失，過去各國打輸貨幣戰的慘痛經歷，在中國出現之機率便大增。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
