【魚樂無窮】點解跌咁多都買唔落手？（唐牛）
騰訊（700）第二季業績強差人意，股價一度跌穿320元，由高位計唔見咗三成，就算神話未破滅，要回復舊觀難度都十分大。有貨無貨應該點做？且看放榜後能否止住跌勢，做出一個波幅區間再處理，但若果失守昨日低位319元，短炒必須止蝕。
騰訊、舜宇光學（2382
）等科網龍頭一一倒下，市盈率去番30倍正常水平，不過，市旺就有買貴冇買錯，市弱就要計好數。事實上，業績轉弱憧憬消失，估值只會進一步下調，這個正常水平，將來好大機會又會變貴，呢個水平值博率依然欠奉，冇貨嘅倒不如等下半年業績出籠，再作打算。同樣估值貴嘅還有教育股及醫藥股，前者受國策困擾，一定碰不得，後者又係高估值受害者，一樣買唔過。
進攻唔得防守又如何？公用股中電（002）屢創新高，與紅底水平近在咫尺，股息率跌至近三厘，從避險角度出發，點計都買唔落手，領展（823）情況亦類似。相對來說，煤氣（003）有紅股因素，吸引力算最大了。講完一輪，你會發現，雖然指數跌咗唔少，但好多股票都係買唔落手，人生最痛苦莫過於此。
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com
