異動空間：炒股就係咁矛盾 - 魏力
在現時的市況，投資者追貨驚接火棒，唔追又驚個市再升，炒股就係時刻都咁矛盾！ 資料圖片
港股上周日日洗倉，頹到一個極點，本周連彈四日，升勢仿似欲罷不能，心態上根本轉唔切，硬要死跟每個浪，隨時搞到精神錯亂。
大約兩三星期前，魏力開始在直播節目，建議「分階
段累積」反向ETF，有貨可作對沖，無貨則為中線再跌作部署。魏力多番強調，反向ETF鬱得慢，睇落無肉食，但勝在波幅細、坐得穩，因為去到呢個位（當時約28200點），個市隨時會彈，要有捱挾倉的準備。
呢幾日個市挾挾挾，有戰友inbox魏力訴苦，佢清咗貨，得隻反向ETF要硬食，大呼「奶嘢」！但即使在恒指最低位（26871點）先入貨，家陣賬面都係輸緊4%，對比上周的洗倉股，中一隻起標唔見2成，又算甚麼？其實所謂「奶嘢」，只屬心理因素，源於「反彈自己無份賺」，仲要隻ETF每日跌幾格，雙重打擊。追貨又驚接火棒，唔追又驚個市再升，炒股就係時刻都咁矛盾！「分階段累積」的好處是，你唔需要擇時，個市挾一段就加一點，攤勻成本，只要大方向無錯，利潤始終會來。當然，如果睇錯市，挾到3萬點樓上，就宜重新審視策略了。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.finance.appledaily.com
