【實力取勝】1196係深港通滄海遺珠（陳承龍）（第192期）
2018-8-30 18:09:51
落筆寫稿前，收到一個好驚人、但又係意料之內嘅消息：偉祿集團（1196）公布截至今年6月底止中期業績顯示，錄得純利3.44億元，按年升308.19%；每股基本盈利27.21仙；不派
中期息。期內，收益為2.2億元，按年升1.88%；毛利6,146.8萬元，按年升17.8%。驚人之處，係好多老散仲未認識呢隻深港通名單入面嘅最大滄海遺珠；意料之內係，小弟一早估到。
喂，盈利升3倍呀，唔怪得公佈業績前，偉祿連升八日，成交仲有所上升，北水牌「5998」、「5999」日日狂買，邊個走去沽就真係傻仔。其實自偉祿被納入深港通之後，股價完全冇乜升過咁滯，離曬大譜。事實勝於雄辯，小弟翻查Disclosure Tracker整理過嘅CCASS資料，由2017年11月3日至2018年8月15日為止，頭24大持倉證券行，偉祿美林證券有限公司有最貨，持股4.74%；第二大就勁咯，就係CHINA SECURITIE，即係北水，持股3.55%，期內買入咗29,380,000股，係頭24大行買得最急、買最多貨、最兇狠嘅行，如果你問CHINA SECURITIE係咪？咪即係北水咯。呢啲資料有咩啟示呢？就係香港市場投資者，完全唔識寶，北水係咁買，一收貨有咩後果？咪絕塵爆升咯。
睇返啲基本資料，1196近年積極開拓物業投資業務，2018年4月完成對觀瀾物業和光明物業的收購後大大提升佢哋嘅物業組合，預期觀瀾物業和光明物業將於2018年下半年產生租金收入。
至於1196旗下位於深圳市龍華區觀瀾嘅樟坑徑工廠物業、由樟坑徑股份公司授予開發權益嘅另一塊樟坑徑工業土地同茜坑工廠物業，向深圳市龍華區城市更新局提交更改土地用途嘅申請「舊改」項目，計劃把前兩者改為住宅及辦公室用途，將後者改為保障房及住宅用途。預期有關申請之批文於2018年下半年授出；倘獲批文，1196將開始有關項目的重新規劃工作。
深圳地價有幾貴，大家都知，1196咁多項目，真係勁。呢隻堅係滄海遺珠，倍升之選，買定啲看門口咯，1196第日升到10蚊，你哋再問我追唔追好，我唔答㗎！
實力取勝 - 陳承龍 舊文
來源 source: http://www.winmoney.hk
