異動空間：彈散市最忌呢樣 - 魏力
彈散市最忌是本身無貨，但因為想偷雞博反彈而買到一手都係，後來不及撤退而中伏。
資料圖片
大市超賣反彈，藉口是中美重啟貿易戰談判，但觀乎中國經濟目前「內憂外患」，周身唔得閒，美國忽然話有得傾，相信只是想趁機攞更多著數而已，並唔係有心想傾。可以預期，就
算雙方埋枱傾，成果亦有限，如中方不作更大讓步，特朗普隨時在中期選舉前「去盡佢」，全面向中國進口貨開徵25%重稅，對個市造成下一波衝擊。
貿易戰、中國經濟放緩之下，港股預期估值亦出現變化。路透資料顯示，港股現時歷史市盈率（PE）為10.3倍，而預測PE則為10.7倍，意味市場預期今年藍籌企業盈利將按年平均倒退4%，相信隨著貿易戰因素持續發酵，盈利預測仍會進一步下調。再統計以6月底作半年結的本港上市公司，整體盈利按年倒退5.5%；而單計8月份發盈警的公司有216間，為2005年有紀錄以來單月新高，反映無論大中小型企業，均已感受到經濟下行的陣陣寒意。
宏觀經濟轉差，股市將進入不斷「彈完再散」的格局，每次反彈應是減磅，增持現金，而非撲入去博一個轉瞬即逝的幾巴仙升幅。最「驟忌」就是本身無貨，但因為想偷雞博反彈而買到一手都係，最後來不及撤退而無謂地中伏。進取者也可趁反彈累積淡倉，但請緊記要量力而為。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.finance.appledaily.com
