智取大市：人行搬龍門救市 - 晉佳
人行行長易綱曲線話畀大家知，未來政策有條件寬鬆，效應就等幾時浮現了。
資料圖片
美股道指周三單日跌超過800點，美債孳息率同時下跌，即係話市場由驚加息變為避險，再視美債為避險工具而買入，美債反應所顯示嘅情緒轉向，可謂180度轉變。
執筆時未知美股
周四市況，如果周三跌一棍就恐慌完成、即時見底重拾升軌非不可能，但若周四美股以相若步伐大跌多一日，咁嘅連環斬倉就唔係話停就停，短線唯一能夠阻止道指急跌嘅因素，就只有突如其來嘅利好政策消息，例如2007年「港股直通車」。
美股急跌，機構投資者自然需要「去槓桿」，資金鏈抽緊加上班師回朝嘅因素，始終拖累港股。之前冇事冇幹，港股已經不問外圍市況日日咁跌，大家根本唔惜貨，一味嫌棄港股，面對美股失蹄之下，再千點千點掟你，未必會手軟。
要資金重臨港股，就要見到基本因素重現轉機，中央政策有具意義嘅作用。就喺呢個時候，人行行長易綱走出嚟話：「多年來，我們一直在說去槓桿。現在槓桿穩住了，是個重大的變化。」冇錯！以中國人思維，龍門係用來搬的，於是槓桿就喺幾個月穩得住了。易綱曲線話你知，未來政策有條件寬鬆，效應就等幾時浮現了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
