【實力取勝】700連跌九日堅罕有（陳承龍）（第198期）
2018-10-12 15:37:24
熊霸天下，果然成功。10月10日晚，小弟同圖爺喺瑞信總部，同Ivan Ho一齊出席「輪證實戰對沖策略現場講座」，基本上都坐滿個場，多謝有嚟嘅朋友，如果有咩安排不周，下次一定做得更
好，重點係，再有策略王搞嘅活動，記得捧場。
騰訊（700）真係好好Put，四百七十幾蚊嘅頂又見咗，但底又未出現，一彈就熊，再彈再熊就係策略，佢仲連跌九日，堅係罕有。之前開700 Put，係因為睇嘅利淡消息排山倒海出現，又話收唔到廣告，又話內地管制青少年打機，人心虛怯嘅情況，同舊年睇到騰訊好牛啱啱相反，所以熊霸天下呢個策略真係冇錯。
但熊霸天下策略，並唔係叫大家沽指數。如果恒指回到25000點左右，跌到得10倍PE左右，可Put嘅空間已經唔多，反而會博反彈，如果跌到24500左右咪cut loss咯。所以，認該揀個股埋手，唔好Put或者熊指數，因為好多時大市反彈，弱股會繼續冇力。好似賭股，銀娛（027）同金沙中國（1928）都係一浪低於一浪，大市彈都唔關佢哋事，呢啲就係好嘅目標。如果係都要買股嘅，可以搵基建股，例如我呢排成日提嘅中國鐵建（1186）同中鐵（390），市差阿爺振興經濟嘅方法，不外乎都係撲爛條路再起過啫，故此基建股係有得諗，況且只得10倍PE左右，抵博。另外內需都可以吼，仲有強勢股如平保（2318）都值得留意。
小弟喺個講座入面，仲有兩招醒大家，嗰兩招就係，出席講座先分享到，唔好噓唔好噓，喺專欄講曬出嚟，一來對親身捧場嘅朋友唔公平，二來再recap一次，下次再搞你哋唔嚟點算？其實呢啲現場分享，同平時直播嘅互動好唔同，更直接更多交流，小弟同圖爺都好enjoy，下次再有呢啲活動，希望見到大家啦。
實力取勝 - 陳承龍 舊文
來源 source: http://www.winmoney.hk
