收市閒情 - 千頌C 2018年10月24日
收市閒情：特朗普的「連橫計」 - 千頌C
特朗普引發中美貿易戰，之後又動作多到，好明顯係要封殺中國！ 資料圖片 適中字型 較大字型
特朗普打貿易戰，狂向中國開波，如果到今日呢個地步，你仲話，「姿態嚟啫，嚇我唔到嘅！」，咁就正係要打醒大家！2018年10月，係一個好重要嘅月份，特朗普嘅動作多到，佢好明顯係要封殺中國！
第一，玩孤立！美國喺月初，同墨西哥、加拿大達成美墨加貿易協議（USMCA）。簡單講，三國就某啲關稅措施讓步。不過，協議加一項條款，規定簽約國如與「非市場經濟國家」展開貿易協議談判，其他簽約國有權退出協定！即係話，「你兩個呀，唔准同中國有貿易協議呀！如果唔係，其餘兩個都要絕交呀！」呢招高呀！只要係同中國傾嚇，最少冇咗兩個國家嘅Contract！咁仲唔係玩杯葛？
呢一項條款有如喺墨西哥、加拿大身上，綁一個自我引爆裝置，邊個敢亂嚟，美國就㩒掣！Bomb！That"s why美國商務部長羅斯，都形容呢條為「毒丸條款」。值得一提係，美國目前仲同日本、歐盟就自由貿易協定談判，如果都落咗呢粒丸，中國就真係好大劑！
第二，打蛇隨棍上！中國世紀大業「一帶一路」，涉9,000億美金嘅投資，竟然率先畀幾個小國摑幾巴，巴基斯坦、馬來西亞、塞拉利昂、斯里蘭卡嘅相關項目相繼出事。正當大家等緊骨牌效應出現之時，特朗普突然「做好人」，設「美國國際開發金融公司」，注資600億美元貸款擔保，增加喺亞洲、非洲與拉丁美洲基建投資！話說佢上任後，陸續削海外投資，今次180度轉軚，有如同你講，「𠵱家知我均真呢？唔想同中國玩唔緊要，我𠵱家同你玩啦！」
第三，玩打亂章法！正當全世界以為特朗普，上星期會列中國為「滙率操縱國」，點知侵侵就話，「我偏唔搞你住」。最得人驚係，過多兩日，美國財政部長姆欽就話，「我哋可能改變滙率操縱個定義㗎！」即係話，我想幾時搞你就幾時搞，你吹咩？
見到佢個套路，似乎係退出曬不同嘅多邊協議，好似TPP、《巴黎協定》、萬國郵政聯盟，甚至暗示要退出世貿（WTO），然後逐個國家傾返曬！如果有讀歷史，秦國張儀嘅「連橫計」，事一強以攻眾弱，就正正係特朗普嘅招數！至於連橫，最終成功瓦解咗「合縱」，秦國，得以統一天下。合縱者，合眾弱以攻一強，「一帶一路」結局係點，應該有所領會。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
