大橋開通插爆市
2018年10月24日
港股周初反彈，前一日已經講到空軍乘機出擊，沽空有成180億元，估唔到一日就發作，一直睇淡大市的淡友昨日大力反擊，恒指無名腫毒都大插800點，搞到上日升幅跌番突晒。港股收市後，喺香港黃昏時段，杜指期貨下插342點，報24952點，外圍仍有壓力。
大市昨日
沽壓重臨，唔理好消息照隊，最明顯係濠賭股。港珠澳大橋開通，按理內地客更易去澳門，但濠賭股不升反跌，成為調整最多板塊之一。龍頭股份銀娛(027) 跌近8%，收報43.45元。永利澳門(1128) 挫5.9%，收報16.74元；金沙中國(1928) 挫5.3%，收報33.3元。內房股是另一重災區，華潤置地(1109) 挫6.6%，收報25.45元；新城發展(1030) 挫5.9%，收報4.02元。
濠賭股借好消息出貨
港珠澳大橋由倡議到落成，有成二、三十年時間。最初係合和主席胡應湘建議起大橋，吸收珠三角西部貨源，確保香港作為出口港地位。呢個建議遲遲無推行，香港貨源早已轉投鹽田港，令香港貨櫃港失去全球第一地位，好彩係塞翁失馬，焉知非福，香港之後大力發展其他產業，經濟不退反進。
有人估計港珠澳大橋開通後，打通咗同廣東省西部交通，未來香港發展會更好。雖然胡應湘幾十年大橋夢成真，但合和(054) 股價無乜反應，收報24.35元，跌1.4%；合和公路(737) 收報4元，跌0.25%，算係好過大市表現。
港珠澳大橋開通，交通改善理應對澳門有利，但濠賭股不升反跌，見到股票跌，乜都可以講，有個解釋係交通方便咗，以後遊客可以唔使喺澳門過夜，減低支出，對做酒店生意嘅博企不利咁話。
睇番美國拉斯維加斯例子，賭場經營飲食同酒店，基本上係好微利，甚至有可能要補貼。澳門博彩公司賭廳有錢賺，酒店同飲食一樣賺錢，呢種模式令各地同業非常羡慕。但無論如何，話大橋通車對澳門濠賭股有壞影響，的確有少少搵嚟講，話個市係淡底，借好消息出貨仲似啲。
實際上，唔少大行剛剛仲出報告唱好濠賭股，野村證券發表報告，就話過去三個月，受貿易戰及賭收增長放緩拖累，濠賭股股價平均下跌29%，跌幅較恒指的11%為高，認為板塊估值及未來盈利能力吸引。
摩根大通亦認為，濠賭股近日呈戲劇性下跌，目前估值及風險回報率吸引，相信近期券商下調評級及股價是因市況，而非基本面出問題，故未來有上調空間。不過，天要落雨，個市想調整，制止唔到。從市場走勢看，充份反映大市喺反彈後有唔少人想出貨，所以好消息都撐唔住大市。
金礦股成逆市奇葩
中港股市乏力，除咗係內地出完招，市場覺得短期無乜政策消息，亦同亞洲股市整體走弱有關。區內股市基本上都回軟，日本央行警告，日本銀行業風險承擔創30年新高，令日股急挫，日經平均指數收報22010點，大挫604點，跌幅達2.7%。
內地股市反彈一日後，滬深股市都跌逾2%，上證指數失守2600關，收報2594點，回吐60點或2.26%；深成指數收報7574點，跌173點或2.24%。
港股跟住都無運行，恒指跌穿26000關，收報25346點，瀉806點，幅度超過3%；國企指數收報10234點，下跌255點或2.44%，成交金額972億元。周一升市沽空不少，昨日跌市沽空都有164億，夜期都低水。
前日沽空入三大的騰訊(700) 急挫4.6%，收報277.8元；另一大股友邦保險(1299) 急挫4.6%，收報61.65元；南方A50(2822) 跟住A股跌3.8%，收報12.6元。呢排投資市場波動，部份資金逃入金市，令金價喺1200美元樓上企穩，金股呢排表現跑贏大市，上市時間較短的山東黃金(1787) 收報16.24元，升0.4%；招金(1818) 收報7.05元，升2%。有中環茶友笑言，金股升代表世界唔好，信乎？
陸羽仁
金融High Tea 舊文
來源 source: http://hdfin.stheadline.com
