收市閒情 - 千頌C 2019年1月2日
收市閒情：2018財圈「柒事」回顧 - 千頌C
劉央 適中字型 較大字型
2018年，來得快，去得快。《收市閒情》財圈「柒事回顧」又係時候放榜！
1）首先係劉央，去年4月講過一句，「我喺405元以下增持騰訊（700），增持了好多，單日買進6億元，騰訊2020年升到1,000元！」騰訊周一收314元，距1,000元「牛央價」，仲有2.2倍潛在升幅。
2）中興（763）以極度低智慧手法，去違反禁令，靜靜雞同伊朗做生意，仲要俾人輕易踢爆：例如搵個同伊朗有血海深仇嘅猶太人去做公司律師，最後律師同FBI放料；白紙黑字寫曬同伊朗交易策略，講公司點避開監管，然後放上網廣傳……呢單嘢豬到一個點，係連國資委都無眼睇，直斥「中興系應對十分愚蠢和被動」。最慘係俾特朗普拎住中興一堆犯罪證據，等佢出師有名，為一連串貿易制裁揭開序幕！
3）李嘉誠上年放售中環中心，金利豐（1031）朱太、小巴大王、磁帶大王等一班有錢人，夾份用402億元接75%業權！嘩！同人講，我係中環中心大業主呀！幾威！
哼！點知好衰唔衰，一接，佢哋就摸頂啦！
4）港交所（388）「香港金融大會堂」去年農曆新年後開張，本來喜事一宗，偏偏個「貝字牆」設計一格格，勁似骨灰龕，牆上仲驚現貪、賊、賄、賂及賤等含貶義字。俾人笑足一日！
之後港交所揀曬啲貶義字出嚟，然後直接搵黃、灰、啡色板遮住佢，由「貝字牆」變「馬賽克牆」。不過呢單嘢嘅膠味，就真係點遮都遮唔住啦。
5）最後，講到年度「柒事」，如果小米（1810）唔上榜，你一定會話我造馬！好少有一間公司搞上市，搞到激嬲曬中港傳媒！小米公關低B到喺現場放一份「如何預防記者」文件任記者拎，仲大大隻字印上「媒體不負責任」呢六隻大字！
講返業績，小米半年行政支出104.57億人仔！呢粒數字背後重頭戲係，雷軍袋99億人仔人工！最好笑係，雷軍竟然話對咁大份糧全不知情！喂呀！口裏說不，口袋應該好誠實吧！
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
