冰說聰明 - 青冰 2019年2月28日
冰說聰明：小收購為大注資開路 - 青冰
遠東環球7年前被中國建築收購，收購通函於上周寄出，將會改名為中國建築興業集團，惹人憧憬。 互聯網圖片 適中字型 較大字型
近期唔少殘股大翻身，靠本身業務走出谷底，由被唾棄至重新注視，已經可以升一兩成，睇國泰（293）及聯想（992）就知。
當然仲有唔少爆炒股份，只得一個殘字，無本業可言，純粹市旺博亂炒，要有質素又夠殘，遠東環球（830）幫到你。
咪住先！青冰，隻嘢今年已經升咗七成，點會係殘股呀？咁你要量化嚇，究竟出咗咩消息。公司向阿媽中國建築（3311）收購基建營運業務，作價約3億，另一亮點係會改名為中國建築興業集團。中國建築在7年前收購遠東環球，當時市場已預期日後將會注資養大佢，點知這7年以來只有炒注資，沒有真注資。戰友可以開幅圖出嚟睇，由2013至16年，每年都會炒一次，每個浪都升四至五成，但每次都冇嘢跟尾。每次炒注資前後的價位，都比現價高，所以話佢係殘股。中國建築集團系在香港有四間上市公司，只有遠東環球未「正名」，所以這個舉動的誠意比注資更大。
收購通函已於上周寄出，下月20日投票，80頁的文件相信戰友未必有心機睇，所以粗重嘢就留畀青冰做啦。在未來5年，公司都可以從兩條橋，收取一個預先定好的固定收入，但又唔需要參與日常營運及管理，獨立財顧更以被動投資來形容，直頭好似收息股咁。點解要花幾億做高息定存咁呀，董事局函件透露咗端倪，收購事項令公司進軍新業務基建管理，向專業管理業務邁進，產生穩定現金流外，更加強營收及盈利基礎。簡而言之，就係借收購開展新業務，日後同類型的注資就更易獲審批啦，谷大咗營收及盈利條數，注更大的基建管理業務就更順暢了。
中國建築（3311）的基建投資業務半年就有135億收入，如果之後安排畀曬阿仔營運，呢條數相當襟計，所以今次收購相信只是頭盤而已。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
