操盤手札記 - 割柑人 2019年3月12日
操盤手劄記：食減稅降費條水 - 割柑人
島港位列全球第八大港口，更係首個應用5G嘅港口。相對同業，其H股估值偏低。資料圖片 適中字型 較大字型
全球經濟轉差，美國、中國、歐洲三大經濟體，分別打出嗌停縮表、減稅降費、重啟TLTRO嘅招數。市場更加擔心衰退，股市借勢調整；不過，喺各地放水下，中長線資產會水漲船高，股市亦然。
周一中港股市即見反彈，滬股升1.92%，港股升0.97%。恒指上周五大裂口跌穿20天線約28600水平，此線成為反彈阻力，嚟緊兩日若未能補回下跌裂口，則只係技術性反彈，睇怕調整未完。後市重要支持係50天線約27500水平，呢個亦係淡友食糊位。
本周戲碼，包括周一美國總統特朗普提交預算案、周二英國首相文翠珊脫歐方案再表決（若遭否決，周三將表決是否硬脫歐；若再遭否決，周四將表決是否押後脫歐），戲肉係當脫歐方案落敗，在野工黨即會提出不信任動議，文翠珊隨時本周下台，股滙市場勢將動盪。
兩會期間，中央兌現減稅承諾。製造業增值稅由16%降至13%，運輸業、建築業就由10%降至9%。傳統製造業再成減稅最大得益者，皆因中央要「穩就業」，失業率控制喺5.5%內，以免影響社會安定。減稅有助改善A股盈利，大摩就將MSCI中國指數盈利預測提高3個百分點。
由改善盈利睇，減稅對批發零售嘅作用最大，可留意相關股份。另外，市場周一傳出，內地醞釀下調港口收費，以刺激經濟、減輕企業經營負擔，現時未知會唔會影響經營貨櫃碼頭等港口業務嘅企業；不過，內地港口股就急漲。
港口股中，可留意青島港（H股：6198，A股：601298）。青島港位列全球第八大港口，更係首個應用5G嘅港口。相對同業，其H股估值偏低，皆因舊年唔派息，但其A股1月喺內地上市時，公司保證今後派息比率保持四成，由於AH同股同權，意味H股將恢復派息，可諗諗。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com
