魚樂無窮 - 唐牛 2019年5月7日
馬上成為壹會員
會員註冊/登入
【魚樂無窮】市況逆轉要點做 - 唐牛
市況逆轉，投資者最緊要係有現金在手。 資料圖片 適中字型 較大字型
中美貿易戰接近大團圓結局之際，美國總統特朗普突然發難，指談判拖得太久，宣佈將於周五向2,000億美元中國進口貨關稅率，由10%上調至25%。一石擊起千重浪，恒指一度插水逾1,100點，將牛仔重倉街貨一網打盡，A股復市更是股災式下跌，滬綜指埋單插逾半成。
市況一下子由反覆尋頂變回消息主導，現階段必須睇實中美官員一言一語部署。追揸沽策略方面，一如以往的玩法，重倉的必須減磅，正常倉位不太入肉的話，不妨多等一兩日才決定去留，輕倉嘅最爽皮，小注博反彈又得，分注入場亦得，講到尾，市況逆轉最緊要係有現金在手。撈貨都要識得揀，我傾向選擇非貿易戰風眼股份，例如恒生（011）、REITs、香港地產股等本土及高息板塊，相反，去年被貿易戰玩殘的中興（763）、萬州（288）及出口股則宜暫時迴避。
今次唔係特朗普第一次玩嘢，亦唔會係最後一次，既然去年咁差嘅市況都捱得過，正是「有咩風浪未見過」，今年享受完4個月升浪才中槍，實在唔需要害怕，最多只係賺少咗咁解。不過，如果昨日一跌令你今年利潤一鋪清袋，我會建議你不要再沾手股票。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com
