異動尋寶 - 魏力 2019年6月19日
【異動尋寶】習特通電 中美破冰？（魏力）
昨日個市無端端升近300點，以為憧憬林鄭90度鞠躬道歉？少年，你這樣想的話，實在太年輕了。一如以往，十問九唔應，機械式回覆，遊花園，唔理大家收唔收貨，「總之我講咗㗎喇！」係咁先。如此這般，浪費了記者、觀眾、市民寶貴的50分鐘，她說了很多，但卻甚麼也沒有說。
無誠意唔緊要，但個市似乎誠意十足，執筆時夜期爆緊400點，逼近兩萬八。好消息有三個：一、歐央行示意放水；二、繼續憧憬減息；但最重要係第三，特習通電，仲話下星期G20會再詳談。市場迅速解讀為中美破冰，貿戰又有得傾。
又要幫大家回帶。今年初升市兩大原因：一、貿戰有得傾；二、中美齊齊放水救市。恒指25000爆到30000點。5月初，侵侵一句加關稅，個市落番去26700，而放水就繼續。家陣年頭兩個升市因素又歸位，個市再上30000？短期，好難。
何解？當你被人耍咗九萬幾次，你仲會唔會好似年初咁信到十足？當然唔會。正常諗法係：趁彈減磅，睇定啲先，你真係傾得成我再追都唔遲；萬一是但一邊又玩嘢，我都無咁傷！傷口需時復元，信心也需時重建，但第一嚇一定係半信半疑，甚至非常懷疑，所以買貨唔急，也唔需要高追；有貨反而可趁機食糊／減磅。
本港週四淩晨，美聯儲會公佈議息結果，減息機會暫時得2成，但7月、9月減息機率則分別達8成及9成，因此今次重點係睇番會後聲明，會唔會露口風，而關鍵是在於會否刪走對利率變動「保持耐性」（patient）呢個字，明日自有分曉。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
