【異動尋寶】減息托美股 貿戰更難傾？（魏力）
貿易戰近日兩邊都係隔岸叫陣，把口好硬，但實質動作不多，目前阿爺個取態就係，你出手我就反制，你做幾多、我做幾多，但又唔會做凸，以一個受害者被逼還抗的姿態迎戰。這樣做有兩個好處：一、不會予人咄咄逼人的感覺（國際形象已夠差，不能再失分）；二、方便繼
續拖字訣，博美國經濟都頂唔住要求和，貿談可以鋤個靚價。
不過，隨晚美聯儲主席鮑威爾就明言，因應貿戰局勢升溫，將採取合適措施以維持經濟增長，市場就解讀為「為減息鋪路」，仲有半個月就議息，但鮑老都等唔切「講得咁白」，多少反映兩件事：一、美國經濟肯係轉差（睇近排製造業數據就明）；二、再唔講美股隨時瓜得，出口術托市刻不容緩。
去年貿戰1.0經驗話畀我地知，美股要大冧一轉，老特立場先會軟化（有數講），但鮑老一出口，個市就掉頭狂挾，市轉好即係議價空間減少，以此角度，減息憧憬可能畀藉口個市挾一下，但卻削弱貿談達成共識的機會。
另外，有三個避險指標想提提大家：
一、金價：連衝三日後1330美金見阻力。要數避險資產喜好，黃金目前排在美債、bitcoin之後，連金價都急抽，可見避到無掟好避，向好去諗，或預視短期股市會有反彈。
二、美債：一星期之間，10年期債息由2.4插落2.1厘樓下，老特四圍潑火，投資者嚇到傻，但鮑威爾演說幫市場定一定驚，債息上番2.135厘（即是債價跌），但要脫離危險期，起碼上番2.2樓上先講。
三、Bitcoin：前晚忽然由8,500美金插落8,000樓下，之後一直上唔番。記得4月初個市風平浪靜時，bitcoin卻突然抽穿4000美金，之後仲non-stop係咁上，股市就5月先大跌。未來幾日不妨望實bitcoin個價，如繼續拾級而下，也是股市利好訊號。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
